«Այն, ինչ մենք տալիս ենք զինծառայողին, բավարար է: Եթե ծնողը գտնում է, որ լրացուցիչ իրեր կան ուղարկելու, դա այլ խնդիր է»,-լրագրողների հետ ճեպազրույցում այսօր անդրադառնալով փաստին, որ չնայած Նիկոլ Փաշինյանի կոչին՝ ծնողները շարունակում են անհրաժեշտ իրեր ուղարկել զինծառայողներին, ասաց ՀՀ ԶՈՒ Գլխավոր շտաբի պետ Արտակ Դավթյանը: Նրա բնորոշմամբ՝ խնդիրը նաեւ անհատական է, քանի որ սոցիալական խմբերը տարբեր են. «Զինծառայողներ կան, որոնք սիրում են մշտապես գտնվել ծնողների ուշադրության ներքո. «Մյուսից «հետ չմնալու» սովորություն էլ կա…եթե խնդիր կա կոշիկի կամ համազգեստի առնչությամբ, պատրաստ ենք քննարկել»:
Արտակ Դավթյանի փոխանցմամբ՝ ընթացիկ զորակոչում զինակոչիկների ծառայողական կոշիկները նույնն են, ինչ եղել են նախորդ զորակոչի ընթացքում, եւ նոր կոշիկներն արդեն պատրաստման փուլում են. «Պահեստավորման փուլն է ընթանում, որի ավարտից հետո զորամասերը կապահովվեն ըստ հասանելիության»:
Ինչ վերաբերում է հագուստին, Դավթյանը տեղեկացրեց, որ զինվորների ներքնաշորերն արդեն իսկ նոր որակի են՝ մեկանգամյա օգտագործման ներքնաշորերից հրաժարվել են. «Փոփոխություն կլինի նաեւ համազգեստի կտորի որակի առնչությամբ»:
Լուիզա ՍՈՒՔԻԱՍՅԱՆ
