«Զորակոչի ընթացքում գլխավոր շտաբը չի տարանջատում պաշտոնյաներին: Ըստ կարգի՝ զինծառայողները զորակոչվում են բանակ, մենք տարբերակումներ չենք դնում, այդ պատճառով վիճակագրություն չունենք»,-լրագրողների հետ ճեպազրույցում այսօր ասաց ՀՀ ԶՈՒ Գլխավոր շտաբի պետ Արտակ Դավթյանը՝ անդրադառնալով հարցին, թե արդյոք շարունակո՞ւմ են խուսափել զինծառայությունից պաշտոնյաների որդիները:
Արտակ Դավթյանն ինքը լրագրողներին հարցեր ուղղեց՝ «պաշտոնյա ասելով ո՞ւմ ի նկատի ունեք», «բարձրաստիճանը ո՞րն է», ապա նշեց. «Դուք իրավունք ունեք ցանկացած նախարարի հարցում ուղարկել եւ պարզել՝ նրա որդին զորակոչվե՞լ է, թե ոչ: Ես այլ բան չեմ կարող ասել»:
Լրագրողները հետաքրքրվեցին՝ «այնուամենայնիվ, կարո՞ղ եք ասել, թե ներկայումս որ պաշտոնյաների որդիներն են ծառայում»: Դավթյանն արձագանքեց. «Ես ի՞նչ իմանամ, չեմ հետաքրքրվում՝ որեւէ նախարարի տղա գնո՞ւմ է բանակ, թե ոչ, իմ ինչի՞ն է դա պետք: Եթե վարչապետի եւ Պաշտպանության նախարարի տղաները ծառայում են, ինչո՞ւ պետք է հետաքրքրվենք: Մեզ համար տարբերակում չկա»:
Լուիզա ՍՈՒՔԻԱՍՅԱՆ
