Իրավական ընթացք՝ Շահումյանի շրջանի «Տաք ջուր» կոչվող տեղամասում կատարված վիճաբանության դեպքի հանգամանքները պարզելու ուղղությամբ
2018թ. դեկտեմբերի 30-ին «Հանրապետական հիվանդանոցից» ոստիկանության Ստեփանակերտի քաղաքային վարչություն հաղորդում էր ստացվել առ այն, որ նույն օրը ժամը 3 անց 45-ին հեմատոմա և սալջարդ վնասվածքներով իրենց մոտ է ներկայացվել Ստեփանակերտ քաղաքի բնակիչ, Շահումյանի շրջանի «Զուար» համայնքի «Տաք ջուր» կոչվող տեղամասի հսկիչ, 1964թ ծնված Ն.Ս-ն.
Կատարված ստուգումների ընթացքում պարզվել է, որ 2018թ.դեկտեմբերի 29-ին ժամը 20-ի սահմաններում Շահումյանի շրջանի «Տաք ջուր» կոչվող տեղամասում Ն.Ս-ին ծեծի են ենթարկել Ստեփանակերտ քաղաքի բնակիչ, 1965թ ծնված Ա. Շ-ն և Մարտակերտի շրջանի բնակիչներ՝ 1968թ ծնված Ս.Ս-ն և 1972թ ծնված Ս.Թ-ն։
Հարկ է նշել, որ տվյալ տարածքում ծառայություն իրականացնող ոստիկանության ծառայողները նկատելով վիճաբանությունը, շտապել են դեպքի վայր և կանխել դրա հետագա ընթացքն ու հնարավոր հետևանքները։
Նշված անձանցից, ինչպես նաև ականատես մեկ այլ անձից վերցվել են բացատրություններ։ Ն.Ս-ի նկատմամբ նշանակվել է դատաբժշկական փորձաքննություն։
Դեպքի հանգամանքները պարզելու ուղղությամբ ստուգումները շարունակվում են։
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ԱՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
Արցախի ոստիկանություն
