Եվրոպայի խորհրդի՝ մարդու իրավունքների հարցերով հանձնակատար Դունյա Միյատովիչը հեռախոսազրույց է ունեցել Ադրբեջանի փոխարտգործնախարար Մահմուդ Մամեդ-Ղուլիևի հետ՝ քննարկելով հակակոռուպցիոն բլոգեր Մեհման Հուսեյնովի գործը, որն այս պահին բանտում հացադուլ է իրականացնում՝ որպես բողոքի նշան իր դեմ առաջ քաշած նոր մեղադրանքների:
«Ես փոխնախարարին ասացի, որ իշխանությունները պետք է հանեն պարոն Հուսեյնովի դեմ դեկտեմբերի 26-ին առաջ քաշված մեղադրանքները, քանի որ դրանք վստահություն չեն ներշնչում: Ես նաև ընդգծել եմ, որ իշխանությունները պարտավոր են անհրաժեշտ բժշկական օգնություն ցուցաբերել պարոն Հուսեյնովին, որի դրությունը ծայրահեղ անհանգստություն է առաջացնում:
Այդ պատճառով նրան պետք է տեղափոխել քաղաքացիական հիվանդանոց, որտեղ նա կարող է ստանալ անհրաժեշտ բժշկական օգնություն:
Ես հույս ունեմ, որ Ադրբեջանի իշխանությունները կհետևեն իրենց պարտավորություններին մարդու իրավունքների ոլորտում:
Ես անհամբերությամբ սպասում եմ Մեհման Հուսեյնովի գործով առաջընթացի և առաջիկա ամիսներին Ադրբեջան իմ այցելությանը՝ շարունակելու կառուցողական երկխոսությունը իշխանությունների և քաղաքացիական հասարակության հետ»,- ասվում է Միյատովիչի հայտարարության մեջ:
Պատրաստեց՝ Վիկտորյա ԱՆԴՐԵԱՍՅԱՆԸ
