Շիրակի մարզխորհրդի տարեվերջյան նիստի ժամանակ Շիրակի մարզպետ Կարեն Սարուխանյանը հայտարարեց, որ ստուգումներ են կատարվել Գյումրու պաթոլոգիա-անատոմիական լաբորատորիայում ու արդյունքներն ուղարկվել են Շիրակի դատախազություն։
Մարզպետը նաև ասաց, որ ինքը բազմիցս հայտարարել է զերծ մնալ կոռուպցիոն բնույթի արարքներից, սակայն որոշ հիմնարկների ղեկավարներ մատների արանքով են նայում։ Իսկ մարզային իշխանությունը, ըստ Կարեն Սարուխանյանի, պայքարելու է կոռուպցիայի դեմ, այս կարճ ժամանակահատվածում արդեն իսկ ապացուցել է, նույն կերպ շարունակելու են աշխատանքները։
Շիրակի դատախազ Կարեն Գաբրիելյանն էլ Aravot.am-ին տեղեկացրեց, որ ոստիկանությունում նյութեր են նախապատրաստվում, որոնք կապված են պաթանատոմիայում կատարված որոշակի ենթադրյալ չարաշահումների հետ։
Մինչդեռ Գյումրու դիահերձարանից մեզ տեղեկացնում են, որ այն ինքնաֆինանսավորվող հիմնարկ է, պետական բյուջեից որևէ լումա չի փոխանցվել, հետևաբար և պետական միջոցները յուրացնելու մասին խոսք լինել չի կարող։ Մեզ տեղեկացրեցին նաև, որ տնօրեն Աշոտ Շահբազյանն իր առարկություններն է ներկայացրել Շիրակի մարզպետարանի աուդիտի արձանագրածի շուրջ։
Ի դեպ, Շիրակը Հայաստանի Հանրապետության միակ մարզն է, որտեղ գործում է պաթոլոգիա-անատոմիական լաբորատորիա։
Նունե ԱՐԵՎՇԱՏՅԱՆ
Լուսանկարը՝ Շիրակի մարզպետարանի
