Ֆորբսը հրապարակել է 2019-ի լավագույն 18 բյուջետային ճամփորդական ուղղությունների ցուցակը: Հայաստանը 13-րդ հորիզոնականում է:
Ցուցակը գլխավորում է Սան Անտոնիոն, Տեխաս (ԱՄՆ), երկրորդ հորիզոնականում է Պուեբլան (Մեքսիկա), 3-րդում՝ ԱՄՆ-ի Հավայի նահանգը, 4-րդում Սուրբ Հելենան, 5-րդում Լագունան (Ֆիլիպիններ), 6-րդ հորիզոնականում է Բալկանյան թերակղզին, 7-րդում՝ Ագրան (Հնդկաստան), 8-րդում՝ Բուդապեշտը (Հունգարիա), 9-րդում՝ Բուենոս Այրեսը (Արգենտինա):
Տասնյակը գլխավորում է Գոբի անապատը (Մոնղոլիա): Տասնյակում ընդգրկված են Հարավային Աֆրիկան, Զանզիբարը, Հայաստանը, Սերբիան, Տրանսիլվանիան (Ռումինիա), Ջորջ Թաունը (Մալայզիա), Մոսկվան (Ռուսաստան), Թայպեյը (Թայվան):
Հայաստանի մասին Ֆորբսի հոդվածագիրը գրում է. «Գտնվելով Կովկասյան լեռնաշղթայում՝ Հայաստանը թաքնված գանձ է, որին դեռեւս զանգվածային զբոսաշրջությունը չի դիպչել : Բայց այն առաջարկելու շատ բան ունի՝ հարուստ պատմություն, գինետներ, տպավորիչ լանդշաֆտ, հնագույն վանքեր և սարեր, որոնց բարձրությունից մարդու շունչ է կտրվում: Հայաստանի մայրաքաղաքը՝ Երևանը, գեղեցիկ քաղաք է, ընդարձակ պողոտաներով, համեղ ռեստորաններով, թանգարաններով և բացօթյա տոնավաճառներով, որտեղ վաճառվում են ձեռքի աշխատանքներ»:
Ֆորբսի հոդվածագիրը, հիշեցնելով իր՝ հայկական արմատների մասին, գրում է, որ մեծացել է հայկական համեղ կերակրատեսակներով: Իր սիրելիներից նշում է հայկական խորովածը, տոլման, լավաշն ու պանիրը:
Հոդվածագիրը խորհուրդ է տալիս. «Գինու սիրահարների համար Հայաստանը հիանալի վայր է: Այստեղ կարող եք համտեսել գինու տարբեր տեսակներ, որոնք պատրաստված են մրգերից, օրինակ՝ Հայաստանի ազգային խորհրդանիշ համարվող նուռը, մոշը, բալը: Մայրաքաղաքից դուրս տեսարժան բնություն է: Կարող եք այցելել Արենիում գտնվող աշխարհի ամենահին գինու գործարան և աշխարհի հնագույն տաճար՝ Էջմիածին»:
Տաթև ՀԱՐՈՒԹՅՈՒՆՅԱՆ
Լուսանկարը՝ Աստղիկ ՄԵԼՔՈՆՅԱՆԻ
