Ռուսաստանի նախագահ Վլադիմիր Պուտինն այսօր շնորհավորել է ՀՀ երրորդ նախագահ Սերժ Սարգսյանին՝ Սուրբ ծննդյան տոների եւ Ամանորի առիթով: Այս մասին տեղեկանում ենք ՌԴ նախագահի կայքէջից: Պուտինն ամանորյա շնորհավորանքներ է հղել նաեւ ՀՀ երկրորդ նախագահ Ռոբերտ Քոչարյանին: Նախկին ղեկավարների թվում Պուտինից շնորհավորանքներ են ստացել նաեւ Իտալիայի նախկին վարչապետ Սիլվիո Բեռլուսկոնին, Ջորջ Բուշ կրտսերը, Ղրղզստանի, Ֆրանսիայի եւ այլ երկրների նախկին ղեկավարները:
Ռուսաստանի առաջնորդը Ամանորի առիթով շնորհավորել է նաեւ Թուրքիայի նախագահ Ռեջեփ Թայիփ Էրդողանին՝ ուրախություն հայտնելով, որ ռուս-թուրքական հարաբերությունները հաջող զարգանում են: Պուտինն ընդգծել է համատեղ իրականացվող ատոմային կայանի առաջին էներգաբլոկի, գազատարի եւ այլ նախագծերի մասին: Նշել է նաեւ, որ Անկարայի հետ համատեղ ուժերով Սիրիայում պայքարում են ահաբեկչության դեմ:
Ռուսաստանի նախագահը Ամանորի եւ Սուրբ ծննդյան տոների առիթով շնորհավորել է նաեւ ԱՄՆ նախագահ Դոնալդ Թրամփին: Ինչպես տեղեկանում ենք ՌԴ նախագահի կայքէջից, Պուտինը նշել է, որ ռուս-ամերիկյան հարաբերությունները ռազմավարական կայունության եւ միջազգային անվտանգության ապահովման ամենակարեւոր գործոնն են: Նա նաեւ ասել է, որ Ռուսաստանը բաց է ԱՄՆ-ի հետ երկխոսության համար առավելագույն օրակարգով:
Սիրիայի նախագահ Բաշար Ասադը նույնպես Պուտինից շնորհավորանք է ստացել, որտեղ ՌԴ նախագահը վստահեցրել է, որ այսուհետ էլ Ռուսաստանն աջակցելու է Սիրիայի կառավարությանն ու ժողովրդին ահաբեկչության դեմ պայքարի, պետական ինքնիշխանության եւ տարածքային ամբողջականության պահպանման գործում:
Պուտինից շնորհավորանք են ստացել նաեւ Հարավ-Աֆրիկյան պետության ղեկավար Սիրիլա Ռամաֆոզուն եւ Ֆուտբոլի միջազգային ֆեդերացիայի նախագահ Ջաննի Ինֆանտինոն: Ֆուտբոլի ֆեդերացիայի նախագահին Պուտինը շնորհակալություն է հայտնել՝ ֆուտբոլի չեմպիոնատը Ռուսաստանում կազմակերպելուն աջակցելու համար:
Պատրաստեց Լուսինե ԲՈՒԴԱՂՅԱՆԸ
