ՀՀ 2-րդ նախագահ Ռոբերտ Քոչարյանի խափանման միջոց կալանքը գրավի դիմաց փոխելու վերաբերյալ պաշտպանական կողմի միջնորդությունն այսօր չի քննվել: Դռնփակ նիստը քիչ առաջ ավարտվեց, եւ Քոչարյանի պաշտպան Արամ Օրբելյանն ասաց լրագրողներին, որ քննիչը խնդրել է հետաձգել նիստը՝ պատճառաբանելով, որ աշխատանքային ժամն ավարտվել է, ու ինքը անձնական գործեր ունի:
Միջնորդության քննությունը նշանակվեց հունվարի իննին: Ռոբերտ Քոչարյանը չի մասնակցել նիստին:
«Իրավունքի չարաշահման կլասիկ միտում եմ տեսնում, գործը ձգձգելու դիտավորություն կա, մոռացան, որ քրեական դատավարության օրենսգրքի համաձայն միջնորդությունները քննվում են անհապաղ, կալանքի գործերը քննվում են գիշերը: Քննիչը արհեստականորեն ձգեց որոշակի ժամանակ՝ ասելով, որ դատավորի ինքնաբացարկի միջնորդություն ունի, նա գտնում է, որ բոլոր դատավորները ոչ պրոֆեսիոնալ են»,- ասաց Արամ Օրբելյանը:
Արփինե ՍԻՄՈՆՅԱՆ
