«2018-ն առանձնացավ ֆեյքերի ակտիվացմամբ: Ծավալներն էապես ավելացան, և դա դարձավ շատ ավելի վտանգավոր»,- «Հոդված 3» ակումբում հրավիրված քննարկմանը հայտարարեց «Իրազեկ քաղաքացիների միավորման» ծրագրերի համակարգող Դանիել Իոաննիսյանը:
Նա նշեց, որ ապատեղեկատվությունը հիմնականում տարածվում էր թե՛ տարբեր ԶԼՄ-ների, թե՛ կեղծ կայքերի միջոցով, որոնց դժվար է ԶԼՄ անվանել, ու նաև սոցիալական ցանցերի միջոցով՝ առաջին հերթին Ֆեյսբուքի:
Դանիել Իոաննիսյանն ասաց, որ այս ապատեղեկատվությանը հակազդելու համար իրականացրին մի շարք գործողություններ. «Նախ շարունակեցինք փաստերի ստուգումը: Տարվա ընթացքում իրականացնում էինք սոցցանցերում կեղծ լուրերի և ապատեղեկատվության մշտադիտարկում: Նախքան հեղափոխությունը հիմնականում կենտրոնացել էինք ազգ-բանակ թեզի վրա, որը տանում էր դեպի հասարակության միլիտարիզացիա, սակայն հեղափոխությունից հետո ազգ-բանակ քարոզչությունը փոխարինվեց այլ քարոզչությամբ»:
Քննարկման ընթացքում տրվեց նաև «Իրազեկ քաղաքացիների միավորման» կողմից իրականացվող հետաքննական լրագրության առցանց դասընթացի մեկնարկը:
«Իրազեկ քաղաքացիների միավորման» գործադիր տնօրեն Աշխեն Մուշեղյանն ասաց, որ ապատեղեկատվության և կեղծ լրատվության դեմ պայքարի առումով Հայաստանը շատ ավելի շահեկան դիրքերում է: Նա պարզաբանեց. «Մի կողմից դաշտը փոքր է, և ստուգված տեղեկատվությունը մեզ համար ավելի հեշտ է հասցնել մեր ընթերցողներին: Ու նաև այնպես է, որ հետ չենք մնում համաշխարհային թրենդների պայքարի գործիքներից»:
Խոսելով լրագրողների համար նախատեսված դասընթացից՝ Աշխեն Մուշեղյանն ասաց. «Վերջին մեկ-երկու տարիներին ահագնացող ապատեղեկատվության դեմ նախատեսել էինք մի ծրագիր, որի ընթացքում լրագրողներին մանրամասն ներկայացնելու էինք այն գործիքները, որոնցով կարող են պայքարել ապատեղեկատվության դեմ»:
Դանիել Իոաննիսյանը հավելեց, որ իրենք մտադիր են բարձրացնել նաև պետական մարմինների ունակությունները ապատեղեկատվության դեմ պայքարում, որ կեղծ լուրերը նվազագույնի հասցնեն:
Ծրագրի օգնական Վիկտորյա Անդրեասյանը նշեց, որ դեռ 2017-ին հասկացել էին, որ մանիպուլյացիաների դեմ պայքարի լավագույն միջոցներից է լրագրողներին կրթելը. «Որոշեցինք սկսել մի ծրագիր, որը ավելի հեշտ հասանելի կլինի: Ծրագիրը մեկնարկեց 2018-ի ապրիլին, այն անվճար է և հասանելի բոլորի համար: Մեր հիմնական շահառուները լրագրողներն են: Առաջին փուլը մեր առցանց դասընթացն է: Մենք փորձել ենք այնպես անել, որ այն հեշտ հասանելի լինի: Երկրորդ փուլում կլինեն դեմ առ դեմ թրեյնինգներ, կհայտարարվի հետաքննական նախագծերի մրցույթ և լավագույն ութ նախագծերը կստանան փոքրիկ ենթադրամաշնորհներ»:
Տաթև ՀԱՐՈՒԹՅՈՒՆՅԱՆ
