Այս վագրի արձանը որեւէ օլիգարխի հետ կապ չունի, այն պարզապես «կանգնած» է շքեղ գրախանութի դիմաց, որը գտնվում է Շարմ էլ Շեյխ Սոհո հրապարակում: Ընդհանրապես այս երկրում մեծագույն հարգանք կա գրչի մարդու եւ ընթերցանության հանդեպ: Ու պատահական չէ, որ Շարմ Էլ Շեյխի բարձրակարգ հյուրանոցներում լողավազանների ու բարերի կողքին բացօթյա մինի-գրադարաններ կան, որպեսզի հյուրանոցի այցելուները ե՛ւ արեւի լոգանք ընդունեն, ե՛ւ գիրք վերցնեն ու կարդան: Հայաստանում բացօթյա գրադարան միայն աղվերանյան հյուրանոցային համալիրներից մեկում եմ հանդիպել, բայց մեր երկրում ընթերցանությունը խրախուսող միջոցառումներ ու պաստառներ՝ որքան ուզեք:
«Թավշյա» հեղափոխությունից հետո էլ պաշտոնյաներից մի քանիսն անգամ հեքիաթ կարդացին՝ «Անտարես» հոլդինգի նախագահ Արմեն Մարտիրոսյանի առաջարկով: Ուրախալի է նաեւ, որ երեւանյան մոլերում գրախանութների մասնաճյուղեր կան: Շատերի համոզմամբ՝ կոպիտ, բայց տեղին էին մի ժամանակ հետեւյալ մակագրությամբ քաղաքի տարբեր անկյուններում տեղադրված ցուցանակները. «Միայն ուղտը չի սիրում գիրք կարդալ»:
Լուսանկարը՝ ԳՈՀԱՐ ՀԱԿՈԲՅԱՆԻ
«Առավոտ» օրաթերթ
27.12.2018
