Տրանսպորտի, կապի եւ տեղեկատվական տեխնոլոգիաների նախարարի պաշտոնակատար Հակոբ Արշակյանն այսօր կառավարության նիստից հետո լրագրողների հետ ճեպազրույցում անդրադարձավ «Հյուսիս-հարավ» ներդրումային ծրագրով աշխատող քաղաքացիների բարձրացրած խնդրին՝ նրանք առավոտից փակել են Երեւան–Թալին ճանապարհը:
Արշակյանն ասաց, կառավարությունը կապ չունի «Հյուսիս-հարավ» ներդրումային ծրագրով աշխատող քաղաքացիների խնդրի հետ: Նախարարի պաշտոնակատարի ներկայացմամբ՝ «Խնդիրը հետեւյալն է՝ մեր հիմնական կապալառուներից «Կորսան» ընկերությունը իր ենթակապալառուներին չի փոխանցել դրամական միջոցները եւ հիմա որոշ ընկերությունների աշխատակիցներ չեն ստացել իրենց աշխատավարձը եւ իրենց բողոքին պետք է ծանոթանանք»:
Արշակյանն ասաց, որ այս քաղաքացիներն իրենց պահանջը կառավարությանն են ուղղում, սակայն կառավարությունն իր պարտականությունները պատշաճ կատարել է, եւ վճարել է եղած աշխատանքների դիմաց. «Ըստ երեւույթին, այնտեղ կապալառուի եւ ենթակապալառուի միջեւ է խնդիրը: Կառավարությունը կապ չունի: Հիմա ուղեւորվում եմ Թալին՝ տեղում ծանոթանալու պահանջին»,-ասաց Արշակյանը:
Նելլի ԲԱԲԱՅԱՆ
