«GALLUP International association»-ի Հայաստանում լիիրավ անդամ «Էմ Փի ՋԻ» ընկերության Երեւանում անցկացված հարցման համաձայն, մայրաքաղաքի հանրապետության հրապարակում մոտ 150 հազար դոլար արժողությամբ նոր տոնածառ տեղադրելու քաղաքապետ Հայկ Մարությանի որոշումը արդարացված է համարում երեւանցիների 70,6 տոկոսը:
Ընկերության տնօրեն Արամ Նավասարդյանն այսօր լրագրողների հետ հանդիպման ժամանակ ասաց, որ հարցումն անցկացվել է դեկտեմբերի 20-25-ի հատվածում, հարցվել է 602 մարդ:
Այս 70,6 տոկոսից 44,7 տոկոսը թանկարժեք տոնածառ տեղադրելու որոշումը որակում է միանշանակ արդարացված, 25,9 տոկոսը՝ ավելի շուտ արդարացված, 13,3 տոկոսը՝ ավելի շուտ արդարացված չէ, 12,5 տոկոսը՝ ընդհանրապես արդարացված չէ:
Նախատոնական Երեւանի ընդհանուր արտաքին տեսքը հավանել է հարցվածների 20,3 տոկոսը, չի հավանել 2,7 տոկոսը: Հարցումն ամբողջությամբ՝ կից: MPG_GIA_YerevanPolice2018
Երեք ամիս առաջ՝ այս տարվա սեպտեմբերին Երեւանի ավագանու արտահերթ ընտրությունում Հայկ Մարությանի ղեկավարած «Իմ քայլը» դաշինքը ձայների 81,06 տոկոսն էր ստացել, իսկ դեկտեմբերի 9-ին կայացած ԱԺ արտահերթ ընտրությունում նույն անունով դաշինքը 11 տոկոսով քիչ ձայն էր ստացել՝ 70,42 տոկոս:
Նելլի ԳՐԻԳՈՐՅԱՆ
