Ադրբեջանի Պետական անվտանգության ծառայությունն իր շարքերում «խորը դավադրական լրտեսական ցանց» է բացահայտել: Այս մասին գրում haqqin.az-ը՝ չհստակեցնելով՝ որ երկրի համար է աշխատել այդ ցանցը:
Մասնավորապես, հաղորդագրության մեջ նշվում է, որ դեռ երեք տարի առաջ Պետական անվտանգության ծառայությունը օպերատիվ տեղեկատվություն էր ստացել, որ Ադրբեջանի հատուկ ծառայությունների համակարգում օտարերկրյա պետության լրտեսական ցանց կա: 3 տարվա աշխատանքների արդյունքում հաջողվել է բացահայտել ցանցը:
Այս պահին Պետանվտանգության ծառայությունը շարունակում է ինտենսիվ միջոցառումները օտարերկրյա հատուկ ծառայությունների գործունեությունը քննելու և հետագայում կանխարգելելու համար, ասվում է հաղորդագրության մեջ:
Դրանում նաև նշվում է, որ քրեական գործերից մեկում հանգամանորեն բացահայտվել և ընդհուպ մինչև առաջին աղբյուր վնասազերծվել է օտարերկրյա հատուկ ծառայությունների հետախուզական ցանց, որը մի քանի տարի մի քանի փուլերից բաղկացած լրտեսական գործունեություն է իրականացրել Ադրբեջանում: Այդ ցանցի գործակալները Ադրբեջանի հատուկ ծառայության աշխատակիցներին ներգրավելու համար գաղտնի հանդիպումներ են ունեցել հարևան երկրների տարածքում և կապի խողովակներ են ստեղծել: Գործով պատասխանատվության են ենթարկվել Ադրբեջանի քաղաքացիներ:
Պատրաստեց՝ Վիկտորյա ԱՆԴՐԵԱՍՅԱՆԸ
