Նախկին փոխվարչապետ Արմեն Գեւորգյանի պաշտպան՝ փաստաբան Էրիկ Ալեքսանյանը զարմացել է լրատվամիջոցների տեղեկություններից, թե իր պաշտպանյալը մեղադրվում է մեկ միլիոն դոլար կաշառք վերցնելու մեջ:
«Ես չգիտեմ՝ լրատվամիջոցները մեկ միլիոն դոլար չափը որտեղից են վերցրել, բայց այո, Արմեն Գեւորգյանը մեղադրվում է առանձնապես խոշոր չափերի կաշառք ստանալու մեջ: Կոնկրետ ինչ չափի մասին է խոսքը գնում, չեմ կարող ասել, որովհետեւ դա վերաբերում է գործի փաստական հանգամանքներին, որը այս պահին չեմ կարող հայտնել»,- Aravot.am-ին ասաց փաստաբանը:
Թե ըստ մեղադրանքի ումից է կաշառք վերցրել եւ ինչի համար, փաստաբանն ասաց՝ կրկին չի կարող ասել նախաքննական գաղտնիք լինելու պատճառով: Նա միայն ասաց, որ թե կաշառք ստանալու, թե սահմանադրական կարգի տապալմանն օժանդակելու եւ թե փողեր լվանալու մեղադրանքներն իր պաշտպանյալը չի ընդունում, իսկ առաջադրված մեղադրանքների վերաբերյալ հետագայում նա իր դիրքորոշումը կհայտնի:
Փաստաբանը վստահեցրեց, որ կաշառքի մեղադրանքը ոչ մի օֆշորային ընկերության հետ կապ չունի, իսկ առաջադրվել է դեկտեմբերի 11-ին, բայց մինչ օրս որեւէ քննչական գործողություն Արմեն Գեւորգյանի մասնակցությամբ չի կատարվել:
Իսկ որպես մեղադրյալ՝ Արմեն Գեւորգյանը, ըստ փաստաբանի, ցուցմունք տվել է: Էրիկ Ալեքսանյանի խոսքով, վարույթ իրականացնող մարմինը կաշառք ստանալու գործով որեւէ փաստարկ չի բերել, ապացույցների բավարար համակցություն չի ապահովել: Իսկ ով է գործով տուժողը, փաստաբանը կրկին հրաժարվեց մանրամասնել:
Արփինե ՍԻՄՈՆՅԱՆ
