«Սասնա ծռերի» գործով հերթական դատական նիստին այսօր ներկա էր նաեւ «Երկիր Ծիրանի» կուսակցության ղեկավար Զարուհի Փոստանջյանը: Լրագրողների հետ զրույցում նա հայտնեց, որ ցանկանում է խմբի անդամների իրավունքները պաշտպանել եւ արդեն ունի փաստաբանական գործունեություն իրականացնելու լիազորություն, բայց մանրամասների մասին առաջիկայում կհայտարարի:
«Սովորական ընթացք ունի դատավարությունը, արտառոց բան չեմ տեսնում, բայց պնդում եմ, որ Սմբատին եւ Արմենին եւս պետք է ազատել կալանքից»,-համոզմունք հայտնեց նա:
Լրագրողների նկատառմանն ի պատասխան, որ Սմբատ Բարսեղյանն ու Արմեն Բիլյանը ոստիկանների սպանության համար են մեղադրվում, Փոստանջյանն ասաց. «Մինչեւ մարդու նկատմամբ օրինական ուժի մեջ մտած դատավճիռը՝ կալանքը բացառիկ միջոց պետք է լինի, որի համար անհրաժեշտ չափորոշիչները ներկայումս չկան: Ես մեղադրանքի հետ էլ համամիտ չեմ, այն օրինական չէ»:
Ապա Զարուհի Փոստանջյանը հստակեցրեց, որ նպատակ ունի պաշտպանել կալանքի ներքո գտնվողներին. «Նպատակն է՝ արդարացնել եւ իրական մեղավորներին պատժել»:
Լուիզա ՍՈՒՔԻԱՍՅԱՆ
