«Արայիկը դեմ էր հանձնվելուն. ասում էր՝ մինչեւ Ժիրոն չասի, չեմ հանձնվի». «Սասնա ծռեր» խմբի անդամ Էդգար Սողոմոնյան

2016թ. ՀՀ ոստիկանության ՊՊԾ գունդը գրաված «Սասնա ծռեր» զինված խմբի գործով հերթական դատական նիստում այսօր պետք է ցուցմունք տար գործով մեղադրյալներից Էդգար Սողոմոնյանը, բայց նա դատավոր Մեսրոպ Մակյանին հայտնեց, որ օգտվում է իր իրավունքից եւ չի ուզում դատարանում ցուցմունք տալ: Ըստ այդմ, դատարանը որոշեց հրապարակել նրա նախաքննական ցուցմունքները։

Հիշեցնենք, որ ըստ քրեական գործի նյութերի՝ Սպիտակ քաղաքի բնակիչ Էդգար Սողոմոնյանը եւս ներխուժել է ՊՊԾ գնդի տարածք, սակայն «Սասնա ծռեր» խմբի հիմնական անդամներից չի համարվում. նա մեղադրյալներից Արմեն Լամբարյանի հավաքագրած անձանցից է: «Ես շփոթված էի ու չէի հավատում՝ ի՞նչ է կատարվում: Հետո հասկացա, որ ոստիկանության տարածք ենք մտել»,-ասել է Էդգար Սողոմոնյանը՝ նախաքննական ցուցմունքում:

Նա հայտնել է, որ Արմեն Լամբարյանն ու իր թիմակիցներն իրեն համոզել են գնալ Երեւան. «Ինձ տարել են…Ասում էին, որ պետք է գնալ ու Ժիրայր Սեֆիլյանին ազատել»:

Սողոմոնյանի նախաքննական ցուցմունքներում տվյալներ կան նաեւ խմբի անդամներից որոշների կողմից կրակոցներ արձակելու առնչությամբ. «Արմեն Բիլյանը մեկ անգամ կրակել է: Դա եղել է զուգարանի դիմացից: Դրանից հետո մի մարդ՝ ուսը բռնած, դուրս է եկել: Ես հետո եմ իմացել, որ ոստիկան է եղել»:

Ինչ վերաբերում է «Սասնա ծռերի»՝ զենքերը վայր դնելուն, Էդգար Սողոմոնյանն ասել է, որ ուրախացել է հանձնվելու փաստից, եւ մինչ այդ էլ ուզել է փախչել գնդի տարածքից. «Վարուժան Ավետիսյանն Արայիկ Խանդոյանին ասում էր, որ ճիշտը հանձնվելն է, բայց Արայիկը դեմ էր: Նա ասում էր՝ Ժիրոն մինչեւ չասի, չեմ հանձնվի»:

Հիշեցնենք, որ մինչեւ ՊՊԾ գնդի գրավումը Ժիրայր Սեֆիլյանը կալանավորվել էր՝ ապօրինի զենք-զինամթերք պահելու-կրելու, ռազմավարական նշանակության շենք-շինություններ, մասնավորապես՝ Երեւանի հեռուստաաշտարակը եւ զորամաս զավթելու փորձի մեղադրանքով:

Լուիզա ՍՈՒՔԻԱՍՅԱՆ