Սերժ Սարգսյանին, Մանվել Գրիգորյանին պատվավոր քաղաքացու կոչումից զրկելու հարցը կքննարկեն մյուս տարի

Արմավիր քաղաքի բնակիչները դիմել են այս համայնքի ավագանուն՝ այսօրվա նիստի օրակարգում ներառել գեներալ Մանվել Գրիգորյանին քաղաքի պատվավոր քաղաքացու կոչումից զրկելու հարցը: Այս նախաձեռնության համար ավագանուն է ներկայացվել արմավիրցիների 300 ստորագրություն: Ավագանու անդամներից մեկը նկատեց՝ արդյոք ճիշտ է մոտ 40 հազարանոց բնակչություն ունեցող քաղաքի ավագանին առաջնորդվի 300 ստորագրության պահանջով:

Ավագանու անդամների մեծ մասի կարծիքով՝ այս պահին որեւէ հրատապություն չկա Մանվել Գրիգորյանին Արմավիրի պատվավոր քաղաքացու կոչումից զրկելու հարցը ներառել նիստի օրակարգում:

Ավագանու անդամներից մեկը՝ Խաչիկ Հարությունյանն  ասաց՝ առայժմ չկա դատարանի որոշում՝ Մանվել Գրիգորյանին առաջադրված մեղադրանքի վերաբերյալ, եւ պետք է սպասել դատարանի վճռին, որովհետեւ եթե ավագանին վաղաժամ որոշում կայացնի՝ ապա ավագանու անդամներ էլ կարող են պատասխանատվության ենթարկվել: Հարությունյանը դիմելով կոչումից զրկելուն կողմ արտահայտվող քաղաքացի Դավիթ Հովհաննիսյանին, ասաց. «10 տարի հետո դու չես լինելու, բայց էդ որոշման տակ իմ ստորագրությունը լինելու է, ու ես պիտի պատասխանատվություն կրեմ»:

Նիստին մասնակցող քաղաքացիներից մեկն էլ նկատեց՝ պատվավոր քաղաքացու կոչումից զրկելու մասին որոշումը որեւէ իրավական հետեւանք չի առաջացնի, քանի որ սա ընդամենը պատվավոր քաղաքացու կոչումից զրկել է, ոչ թե՝ Արցախի հերոսի:

Քաղաքացի Դավիթ Հովհաննիսյանն էլ ասաց՝ «Մենք ոչ թե որոշում ենք ինքը նստի-չնստի, այլ ինքը արժանի Արմավիր քաղաքի պատվավոր քաղաքացի չի: Էսօր սաղ Հայաստանը գիտի, որ ինքը տուշոնկա գողցող է: Ի՞նչ է արել ինքը քո քաղաքի համար»:

Ավագանու անդամներից մեկն էլ արձագանքեց՝ «Իմ քաղաքի համար չի արել, իմ ազգի համար է արել: Տուշոնկա գողացել է, չի գողացել, թողնենք մի կողմ: Բայց որ ինքը ազգային հերոս է, գեներալ է…»:

Ավագանին որոշեց՝ Մանվել Գրիգորյանին Արմավիր քաղաքի պատվավոր քաղաքացու կոչումից զրկելու հարցը չներառել այսօրվա նիստի օրակարգ, այն հրատապ չէ: Եվ քանի որ կան եւս մի շարք քաղաքացիներ, որոնք ունեն Արմավիրի պատվավոր քաղաքացու կոչում, օրինակ՝ Սերժ Սարգսյանը, հաշվի առնելով, որ նրանց հարցն էլ պետք է քննարկվի, ուստի ավագանին որոշեց այս հարցերը քննարկել 2019 թվականին  Արմավիր քաղաքի ավագանու նիստերից մեկում:

Դատարանը Մանվել Գրիգորյանի խափանման միջոցը փոխեց՝ 25 միլիոն դրամ գրավի դիմաց՝ մի շարք հիվանդությունների առկայության եւ այլ հիմնավորմամբ եւ նա իր դատավճռին կսպասի ազատության մեջ: Մանվել Գրիգորյանի կալանքի միջոցը փոխելու դատարանի որոշման դեմ բողոքի ցույցեր են ընթանում Էջմիածնում:

Գլխավոր դատախազությունն էլ վերաքննիչ բողոք է ներկայացրել դատարանի որոշման դեմ:

Նելլի ԲԱԲԱՅԱՆ