Սփյուռքահայ մի շարք գործիչներ այսօր բողոքի ցույց էին անում ՀՀ սփյուռքի նախարարության շենքի դիմաց՝ դժգոհելով կառավարության որոշման նախագծից, համաձայն որի՝ Սփյուռքի նախարարությունը լուծարվելու է: «Սփյուռքի նախարարությունն այն օղակն է, որն իրաքահայերին ճիշտ ճանապարհ ցույց տվեց, օգնեց խնդիրները լուծել: Չեմ ասի, թե բոլոր հարցերը լուծվել են, բայց Սփյուռքի նախարարության դերը մեծ է: Այս տասը տարում գործակցել եմ նախարարության հետ եւ տեսել եմ այն մեծ նպաստը, որը կառույցը տվել է իրաքահայերին՝ թե ՀՀ-ում, թե բուն Իրաքում»,-լրագրողների հետ զրույցում հայտարարեց Իրաքի հայ համայնքի ներկայացուցիչ Վարանդ Պետրոսյանը:
Նա համաձայն չէ կարծիքների հետ, թե Սփյուռքի նախարարությունը կարող է գործել նաեւ որպես, օրինակ, կոմիտե՝ Արտաքին գործերի նախարարության կազմում. «ԱԳՆ-ն ոչ բոլոր երկրների հետ ունի դիվանագիտական կապեր, իսկ Սփյուռքի նախարարությունը սփյուռքի բոլոր հայկական համայնքների հետ կապ ունի»:
Պետրոսյանն ընթերցեց իրաքահայ համայնքի նամակը, որում վարչապետի պաշտոնակատար Նիկոլ Փաշինյանին կոչ է արվում վերանայել Սփյուռքի նախարարությունը լուծարելու որոշումը. «Այս կառավարությունը միայն ՀՀ-ինը չէ, այլ ողջ սփյուռքինը: Պահանջում ենք վերանայում»:
Լուիզա ՍՈՒՔԻԱՍՅԱՆ
