Օրերս Canvas art Cafe –ում տեղի ունեցավ նկարչուհի Մարիամ Դաշտոյանի անհատական «Ես» ցուցահանդեսը: Այդ օրը լրացավ նկարչուհու ծննդյան 22- ամյակը: Ցուցահանդեսը բազմամարդ էր:
«Մարիամը խենթ է ու իր նկարներն էլ են այդպիսին: Հիանում եմ իր տաղանդով և համոզված եմ, որ սա դեռ սկիզբն է»,- այցելուներից ասաց Քնարիկ Կիրակոսյանը: Մարիամ Դաշտոյանը նշեց, որ ժամանակն է կտրվել աշխարհից, սուզվել կտավների խորության մեջ, վերապրել այն, ինչը ստիպում է արվեստագետին վերցնել վրձինն ու արարել:
«Մանկուց նկարել եմ պատերին, հատակին, որտեղ հասցրել եմ, իսկ հիմա անգամ մարդկանց վրա, երբ կտավներս վերջանում են: Փորձեք նայել հոգու աչքերով, և կտավներս կխոսեն ձեզ հետ: Սիրում եմ գույներն իրենց բոլոր երանգներով, գույների խաղը, տրամադրությունը»,- հավելեց նկարչուհին:
Երկար տարիներ Մարիամ Դաշտոյանի նկարների մեջ բացակայել են մարդիկ , բայց ցուցադրված նկարներում նա կրկին անդրադարձավ նրանց:
Մարդկանց շատ եմ նկարել ուսումնական տարիներին, հետո երկար տարիներ չեմ նկարել, ինչու՝ չգիտեմ: Վերջերս սկսեցի մարդկանց աբստրակտ ոճի մեջ պատկերել և ահա այսօր դուք տեսնում էք դա՝ ցուցադրված նկարներում», – պարզաբանեց Մարիամ Դաշտոյանը:
Հավելենք, որ նկարչուհին ունեցել է երեք անհատական ցուցահանդես:
Արևիկ ԿԱՐԱՊԵՏՅԱՆ
