Դատարանը երեկ 25 միլիոն դրամ գրավի դիմաց ազատ արձակեց Ազգային ժողովի նախկին պատգամավոր Մանվել Գրիգորյանին։ Գրիգորյանի ազատ արձակման հետ կապված, վարչապետի պաշտոնակատար Նիկոլ Փաշինյանը ասաց, որ ուրախ կլինի, եթե պարզվի, որ որոշումը դատարանի արդարության արդյունքում է կայացվել. «Եթե պարզվի, որ սա ինչ-որ ապօրինի ազդեցության արդյունք է, ես բնականաբար շատ կտխրեմ: Եթե պարզվի, որ սա դատարանի անկախության արտահայտությունն է, ես շատ կուրախանամ,- ասաց Փաշինյանն ու շարունակեց. «Պետությունը, մենք, կառավարությունը, այսպես ասաց ճնշումներ չի գործադրում դատական համակարգի վրա, բայց ես համոզված չեմ, որ ինչ-որ հին մեխանիզմներ, հին կապեր եւ այլն չեն գործում: Որովհետեւ դատական համակարգի ծագումնաբանությունը բոլորս գիտենք: Բայց ես նաեւ չեմ ուզում որեւէ դատավորի անմեղության կանխավարկածը խախտեմ: Որովհետեւ, եթե մենք ուզում ենք դատական համակարգը անկախ լինի, նաեւ պետք է ընդունենք, որ միշտ չէ, որ քննչական մարմնի, մեղադրող կողմի եւ դատարանի կարծիքները կհամընկնեն»:
Վարչապետի պաշտոնակատարն ասաց, որ Հայաստանի քաղաքացին պետք է վստահ լինի, որ կառավարությունը չի միջամտում դատական իշխանության գործերին: Նրա խոսքով՝դրա ապացույցներից մեկն էլ հեռախոսազրույցների գաղտնալսումների հրապարակված ձայնագրություններն են. «Այս վերջին գաղտնալսման մեջ ի՞նչ էր ասվում։ ԱԱԾ տնօրենը ինձ զանգել, ասում է՝ դատավորը վախենում է։ Ո՞նց թե՝ դատավորը վախենում է։ Ումի՞ց է վախենում, եթե մենք չենք վախեցրել, նշանակում է՝ ուրիշ վախեցնող կա չէ՞, որ վախենում է»:
Մանրամասները՝ տեսանյութում
Տաթեւիկ ՂԱԶԱՐՅԱՆ
