«Սանիթեք» ընկերությունը չունի տեխնիկայի այն քանակը, որը պետք է ձյուն գալու դեպքում Երեւան քաղաքը լիարժեք կերպով սպասարկելու համար: Այսօր այս մասին ասաց Երեւանի քաղաքապետ Հայկ Մարությանը՝ ավագանու նիստից հետո տեղի ունեցած ճեպազրույցում:
«Ինչպես աղբահանությունը, ձմեռը ձնմաքրման աշխատանքները, ըստ պայմանագրի, նույնպես կատարում է «Սանիթեք» ընկերությունը: Մենք արդեն այցելել ենք «Սանիթեք» ընկերություն, ստուգել ենք իրենց տեխնիկան, աղի քանակ եւ աշխատուժը՝ պարզելու համար ընկերությունն ի զորո՞ւ է կատարել այս աշխատանքները, թե ոչ: Կարող եմ վստահ ասել, որ տեխնիկական պակաս է այս պահին եւ այս ամենն ուղղակի ստացել ենք որպես ժառանգություն նախորդ իշխանություններից»,-ասաց Մարությանը:
Նրա ներկայացմամբ, ներկայումս աղբահանությամբ զբաղվող օպերատորի հետ բանակցություններ են ընթանում: Քաղաքապետը հույս հայտնեց դա հնարավորություն կտա որոշ չափով շտկել իրավիճակը:
Ըստ Հայկ Մարությանի, իրենք բանակցում են նաեւ տարբեր ճանշինների հետ, որպեսզի իրենք նրանց տեխնիկան նույնպես վարձակալությամբ տրամադրեն «Սանիթեքին»:
«Մենք դրել ենք կարգ ու կանոն ձնմաքրման աշխատանքների մեջ, այսինքն՝ չեն լինելու ընտրովի ձնմաքրման աշխատանքներ: Նախկինի պես, եթե մի պաշտոնյա պետք է տանից դուրս գա, մաքրվում էր նրանց տան դիմացը կամ տվյալ պաշտոնյայի երեխաների դպրոցը»,-ասաց Հայկ Մարությանը՝ նշելով, որ տնտեսվարողներն արդեն տեղեկացվել են իրենց դիմացի մայթեզրերն ինքնուրույն սպասարկելու մասին:
Լուսինե ԲՈՒԴԱՂՅԱՆ
