Դատավոր Ռուբեն Վարդազարյանի նախագահությամբ այսօր «Լիդիան Արմենիա»-ն ընդդեմ Լեւոն Գալստյանի գործով հերթական նախնական դատական նիստն էր: Այս քաղաքացիական հայցով Ամուլսարը շահագործող ընկերությունը «Հայկական բնապահպանական ճակատ»(ՀԲՃ) նախաձեռնության համակարգող խորհրդի անդամ, բնապահպան Լևոն Գալստյանից պահանջում է հերքել civilnet.am-ին տված հարցազրույցում հնչեցրած տեղեկությունները, ինչպես նաեւ՝ ՀԲՃ-ի եւ Գալստյանի «ֆեյսբուքյան» էջերում կատարված որոշակի գրառումները, որոնք, ըստ «Լիդիան»-ի, զրպարտիչ բնույթի են: Ընկերությունը պահանջում է նաեւ բնապահպանից իր օգտին բռնագանձել 1 միլիոն դրամ՝ որպես փոխհատուցում:
Նիստի մեկնարկին լրատվամիջոցների ներկայացուցիչները դատավորից խնդրեցին թույլատրել տեսանկարահանել դատական նիստը: «Լիդիան»-ի շահերի ներկայացուցիչ, փաստաբան Ելենա Կասպարովան առարկեց. «Դեմ չեմ, որ ԶԼՄ-ները ներկա լինեն եւ ձայնագրառումներ անեն, բայց դեմ եմ տեսանկարահանմանը:
Պատասխանող կողմ Լեւոն Գալստյանը չհամաձայնեց. «Գործը հանրային նշանակություն ունի եւ հանրային շահ է հետապնդում, տեսագրությունը պետք է թույլատրվի»: Ելենա Կասպարովան էլ իր հերթին չհամաձայնեց. «Չհասկացա, թե ինչով է հիմնավորում հանրային շահը: Չեմ կարծում, որ անհրաժեշտություն կա նկարահանման»:
Դատավոր Վարդազարյանի որոշմամբ՝ տեսանկարահանումը մասամբ թույլատրվեց. «Լիդիան»-ի շահերի ներկայացուցչին տեսանկարահանելն արգելվեց: Ապա «Լիդիան»-ի շահերի ներկայացուցիչ Ելենա Կասպարովան հայտարարեց, որ ցանկանում է հստակեցնել՝ լրացնել իրենց հայցապահանջը, եւ այդ հիմքով նիստը հետաձգվեց մոտ մեկ ամսով:
Լրագրողների հետ զրույցում Լեւոն Գալստյանն ասաց, որ «Լիդիան»-ի հայցը փորձ է՝ լռեցնելու եւ վախեցնելու այն մարդկանց, որոնք շարունակում են պայքարել ՀՀ-ում հանքարդյունաբերության զարգացման դեմ. «Ենթատեքստից կտրված հատվածներ են վերցրել եւ ներկայացրել: Օրինակ, գրել են, որ ես ասել եմ՝ «Ամուլսարում 73 տոննա ոսկի չկա»: Նորից եմ կրկնում՝ լուրջ կասկածներ ունեմ, եւ շատ գիտնականներ են ասում, որ այդտեղ այդքան ոսկի չկա: Չեմ կարող հիմնվել միայն շահագրգիռ կողմի տվյալների ու նախկին կոռումպացված կառավարության տված շահագործման թույլտվության վրա: Սա շատ պարզ է ինձ համար՝ որպես հանրային գործիչ»:
https://www.facebook.com/aravot.am/videos/965617316972882/
Լուիզա ՍՈՒՔԻԱՍՅԱՆ
«Լիդիան Արմենիա»-ի մեկնաբանությունը դատական հայցի առնչությամբ այսօր Aravot.am-ը կներկայացնի ավելի ուշ:
