«Դեռ հավատում ենք: Խնդրում ենք, որ մեր ընտրած վարչապետը հանդիպի մեզ»,-Կառավարության դիմաց ՀՀ մշակույթի նախարարության աշխատակիցների բողոքի ցույցի ժամանակ այսօր լրագրողների հետ զրույցում հայտարարեց նախարարության մշակութային ժառանգության վարչության գրական ծրագրերի համակարգող Տաթեւիկ Սուքիասյանը:
Հիշեցնենք, որ ըստ Կառավարության օրենքի նախագծի՝ Սփյուռքի նախարարությունը պետք է լուծարվի, իսկ Մշակույթի նախարարությունը՝ միավորվի ԿԳ նախարարությանը:
Տաթեւիկ Սուքիասյանը կարծում է, որ նշյալ նախագիծը շտապողականության հետեւանք է, այն պետք է վերանայել. «Նման նախագիծ պետք է ձեւավորվեր հանրային եւ մասնագիտական քննարկումների արդյունքում»:
Ինչ վերաբերում է նախարարության աշխատակիցների եւ նախարարի պաշտոնակատար Լիլիթ Մակունցի երեկվա հանդիպմանը, Տաթեւիկ Սուքիասյանը հայտնեց, որ Մակունցն իրենց առաջարկել է հիմնավորում պատրաստել՝ ուղղված վարչապետին. «Նա ասաց, որ ինքը կստորագրի այդ թուղթը, որը եւս կներկայացնենք վարչապետին»:
Հիշեցնենք, որ նախարարության աշխատակիցները պահանջում են Մշակույթի նախարարությունը պահպանել որպես առանձին գերատեսչություն:
Տաթեւիկ Սուքիասյանի բնորոշմամբ՝ եթե իսկապես մտահոգություններ կան, որ որոշ հաստիքներ պետք է կրճատվեն, թող փորձագիտական խումբ ստեղծվի եւ փաստի դա, ոչ թե բամբասանքներ հնչեն, թե Մշակույթի նախարարությունում սուրճ են խմում եւ թերանում աշխատանքում:
Նախարարության աշխատակիցները նաեւ հայտարարեցին, որ Լիլիթ Մակունցն իրենց բողոքի գործողությունների առնչությամբ առարկություններ չի հայտնել եւ չի փորձել որեւէ կերպ միջամտել: Նրա խնդրանքով աշխատակիցները վերադարձել են նախարարություն եւ սպասում են վարչապետին ուղղված նամակի պատասխանին:
Լուիզա ՍՈՒՔԻԱՍՅԱՆ
բամբասանքների հիման վրայ, ամբողջ երկիրը լիովին տակնուվրայ եղաւ, երկու ամսուայ մէջ քառորդ դար ետեւ գնաց… նոյն մօտեցումով նախարարութիւն մը անհետացնելը ի՞նչ է որ… նորէն ալ, տեսնենք… հիմա որ «ժողովուրդը» այս է ուզում…