Սույն թվականի դեկտեմբերի 15-16-ին Մոսկվայում կայացավ եվրասիական ազգային հագուստի բարձր նորաձևության «Էթնո-Էրատո» 2018 մրցույթը։
Մրցույթի կազմակերպիչն էր Եվրասիական ժողովուրդների ասամբլեան (ԵԺԱ): Ասամբլեայի հայաստանյան կառույցը ներկայացնում է ասամբլեայի գլխավոր քարտուղարի տեղակալ, Հայաստանի Դեմոկրատական կուսակցության նախագահ Արամ Սարգսյանը:
ԵԺԱ – ն իրականացնում է՝ ամենատարբեր ծրագրեր, որի շրջանակներում էլ հենց հայտարարված էր մրցույթը:
Մրցույթի նպատակն էր ոչ միայն պահպանել և զարգացնել ազգային մշակույթների բազմազանությունը, այլև հանրահռչակել և խրախուսել այն նկարիչ-մոդելավորողներին, ովքեր խնամքով պահպանում և զարգացնում են ազգային ավանդույթները ժամանակակից նորաձևության մեջ՝ հարստացնելով դրանք ժամանակակից տեխնոլոգիաներով և տենդենցներով:
Մրցույթն անցավ 8 անվանակարգերով.
- Լավագույն սլավոնական զգեստ
- Կովկասյան ժողովուրդների լավագույն զգեստ
- Լավագույն արևելյան զգեստ
- Ուգրո-ֆիննական ժողովուրդների լավագույն զգեստ
- Հյուսիսի, Սիբիրի և Հեռավոր Արևելքի ժողովուրդների լավագույն զգեստ
- Էթնիկ մոտիվները ժամանակակից հագուստներում
- Ռետրո ոճը ազգային հագուստներում
- Էթնիկ բեմական զգեստ
Հայաստանից, ի թիվս այլ թեկնածուների, ԵԺԱ-ի հայաստանյան կառույցն ընտրեց և երաշխավորեց Տերյան մշակութային կենտրոնը՝ տաղանդաշատ և շնորհալի նկարիչ-մոդելավորող, կենտրոնի ղեկավար Լիլիթ Մելիքյանի գլխավորությամբ: Կենտրոնն իր հագուստները ներկայացրեց երկու անվանակարգում՝ «Կովկասյան ժողովուրդների լավագույն զգեստ» և «Էթնիկ մոտիվները ժամանակակից հագուստներում»։
Առաջին անվանակարգում «Տերյան մշակութային կենտրոն»-ը հաղթող է ճանաչվել, իսկ երկրորդ անվանակարգում՝ զբաղեցրել է երրորդ հորիզոնականը։
Նշենք, որ մեր մասնակցին մեծ աջակցություն է ցուցաբերել Ռուսաստանում Հայաստանի դեսպանությունը: Միաժամանակ կենտրոնը դիմել էր մոսկվաբնակ հայազգի կամավորների, ովքեր որպես մոդել կհամաձայնեին մասնակցել մրցույթին և ներկայացնել Հայաստանը: Կենտրոնի ղեկավարի խոսքերով եղել է լայն արձագանք և թիմը կարողացել է լավագույնս ներկայանալ մրցույթին:
Մասնակցությունը և հաղթանակը մեծ հաջողություն ենք համարում հայ մշակույթի հանրահռչակման և տարածման առումով և սրտանց շնորհավորում ենք Տերյան մշակութային կենտրոնին և անձամբ Լիլիթ Մելիքյանին:
Եվրասիական ժողովուրդների ասամբլեայի
հայաստանյան կառույցի պատասխանատու քարտուղար
Հռիփսիմե Հովակիմյան
21.12.2018թ.
