Այսօր առավոտից Մշակույթի նախարարության գործադուլ հայտարարած աշխատակիցներն իրենց բողոքի գործողությունները շարունակեցին Կառավարության դիմաց: Հիշեցնենք, որ նրանք բողոքում են Կառավարության այն նախագծի դեմ, համաձայն որի՝ Մշակույթի նախարարությունը մի մասով մտնելու է Քաղաքաշինության կոմիտեի, իսկ մյուս մասով՝ ԿԳ նախարարության կազմի մեջ:
Գործադուլավորներին մոտեցավ Կառավարության ներկայացուցիչը, որպեսզի նրանց նամակը փոխանցի վարչապետի պաշտոնակատարին: «Աթոռի համար չենք եկել, այլ խնդրում ենք…նման կառույցը հույժ կարեւոր է: Ուժեղացնենք այն: Չեղարկեք այդ նախագիծը, քանի որ այն չի քննարկվել մասնագիտական մակարդակում»,-նամակը հանձնելիս հայտարարեց Մշակույթի նախարարության ՊՈԱԿ-ներից մեկի աշխատակից Լուսինե Իգիթյանը:
Իսկ թե ինչու վարչապետը չեկավ մշակույթի գործիչներին անձամբ լսելու, կառավարության ներկայացուցիչն այսպես բացատրեց. «Նախ՝ վարչապետն ինքն է որոշում իր գործողությունները, եւ հետո՝ նա տեղում չէ: Նամակին գրավոր պատասխան կտրվի»:
Գործադուլ անող աշխատակիցները պահանջեցին, որպեսզի վարչապետն իրենց ընդունի հնարավորինս շուտ: «Եթե մեր բողոքին պատասխան չտրվի, պատրաստ ենք տոնական օրերին էլ շարունակել բողոքը, նստացույց էլ կանենք»,-նշեց Լուսինե Իգիթյանը:
Մշակույթի նախարարության աշխատակիցները հույս հայտնեցին, որ Նիկոլ Փաշինյանը հաշվի կառնի իրենց խնդրանքը, կհանդիպի իրենց, եւ Մշակույթի նախարարությունը կշարունակի գործել որպես առանձին գերատեսչություն: Նրանք վերադարձան իրենց աշխատավայր:
Լուիզա ՍՈՒՔԻԱՍՅԱՆ
