ԱՄՆ պաշտպանության նախարար Ջեյմ Մետիսը փետրվարին հրաժարական կտա: Այս մասին հայտնել է ԱՄՆ նախագահ Դոնալդ Թրամփը, հաղորդում է BBC-ն:
Մեթիսը Սպիտակ տանն աշխատել է 2016թ. հունվարից՝ Թրամփի՝ նախագահ դառնալուց ի վեր: Նախագահին ուղղված իր նամակում Մեթիսն իր որոշումը բացատրել է ԱՄՆ առաջնորդի հետ հայացքների անհամապատասխանությամբ:
«Գեներալ Ջեյմս Մեթիսը պատվով հանգստի կգնա փետրվարի վերջին՝ իմ աշխատակազմում պաշտպանության նախարարի պաշտոնում ծառայելով վերջին երկու տարին,- գրել է Թրամփը Twitter-ի իր էջում: Ջիմի պաշտոնավարման ընթացքում մենք հասել ենք հսկայական առաջընթացի՝ հատկապես նոր ռազմատեխնիկայի մատակարարման հարցերում»:
Թրամփի խոսքով՝ Մեթիսն իրեն հսկայական օգնություն է ցուցաբերել՝ խրախուսելու դաշնակիցներին և մյուս երկրներին կատարել ռազմական ոլորտում իրենց ստանձնած պարտավորությունները:
Թրամփը հայտնել է, որ պաշտպանության նոր նախարարը կնշանակվի առաջիկայում, և ջերմորեն շնորհակալություն է հայտնել Մեթիսին ծառայության համար:
Մեթիսի մեկուկես էջանոց նամակը թվագրվում է դեկտեմբերի 20-ին և որևէ կասկած չի թողնում նրա հեռանալու պատճառների վերաբերյալ:
Այսպես, երեկ Թրամփը հայտարարել է, որ զորքերը դուրս է բերում ԱՄՆ-ից: Բացի այդ, ամերիկյան մի շարք լրատվամիջոցներ հինգշաբթի երեկոյան հայտարարեցին, որ Սպիտակ տունը դիտարկում է Աֆղանստանում ամերիկյան կոնտինգենտը զգալիորեն կրճատելու հնարավորությունը:
Պենտագոնի ղեկավարն իր նամակում նշել է, որ ԱՄՆ-ի մոտեցումը այն երկրների հարցում, որոնց ռազմավարական շահերը հակասում են ամերիկյանին, պետք է լինի կոշտ և անվարան:
«Հստակ է, օրինակ, որ Չինաստանը և Ռուսաստանը ցանկանում են աշխարհը կառուցել համաձայն իրենց ավտորիտար մոդելի, (…) առաջ քաշել սեփական շահերը ի հաշիվ հարևանների, ԱՄՆ-ի և մեր դաշնակիցների»,- ասվում է նամակում:
Մեթիսը նշել է, որ ԱՄՆ-ը, իր կարծիքով, պետք է ամեն բան անի, որպեսզի պաշտպանի սեփական անվտանգությանն ու բարգավաճմանը նպաստող միջազգային կարգը:
«Քանի որ դուք իրավունք ունեք ունենալու պաշտպանության նախարար, որի հայացքներն ավելի լավ են համընկնում ձեր պատկերացումների հետ այդ և այլ հարցերով, ես ճիշտ եմ համարում հրաժարական տալ»,- գրել է Մեթիսը նամակում:
Թրամփի որոշումը՝ ընդունել Մեթիսի հրաժարականը, քննադատաբար է ընդունվել Վաշինգտոնի քաղաքական շրջանակներում, ընդ որում Թրամփին քննադատում են նաև սեփական կուսակցության ներսում:
Պատրաստեց՝ Վիկտորյա ԱՆԴՐԵԱՍՅԱՆԸ
