Արդեն որերորդ օրն է Հանրապետության հրապարակին հարակից փողոցներում երթեւեկությունը կաթվածահար է: Այդ կողմերով անցնող վարորդներն ուղղակի պատանդ են մնում հրապարակում՝ ժամերով հայտնվելով խցանման մեջ: Պատճառը հրապարակի նոր տոնածառի տեղադրման ու Ամանորի նախապատրաստական աշխատանքներն են, որոնք դժվարացնում են ավտոմեքենաների տեղաշարժը: Ճանապարհային ոստիկանությունն էլ այդ կողմերում չի երեւում՝ հույս ունենալով, որ վարորդները ինքնակազմակերպվեն ու խցանումից դուրս գալու ելքեր կգտնեն:
Վարորդների խոսքով, այդ իրավիճակի պատճառով նոր տոնածառը ոչ թե դրական, այլ՝ բացասական հույզեր է առաջացնում, որովհետեւ մարդիկ հետ են ընկնում պլանավորած գործերից, նյարդայնանում:
Այսօր Aravot.am-ը ոստիկանապետ Վալերիյ Օսիպյանին փոխանցեց վարորդների դժգոհությունը, հարցնելով՝ հնարավոր չէ՞ այդ աշխատանքները կազմակերպել առանց փողոցները ծանրաբեռնելու:
Հարցրինք նաեւ, ինչո՞ւ ճանապարհային ոստիկանները չեն միջամտում, ճանապարհները չեն բացում:
Վալերիյ Օսիպյանի խոսքով, քաղաքապետարանը դիմել է ոստիկանություն՝ խնդրելով աշխատանքները կատարել եւ դրանով էլ պայմանավորված Հանրապետության հրապարակի ճանապարհները փակվել են. «Վստահեցնում եմ ձեզ, որ ոստիկանությունն ունի այդ ներուժը եւ պատրաստակամ է ծառայել ժողովրդին: Այսօր արդեն իսկ մարզերից Ճանապարհային երթեւեկության ստորաբաժանումների հավելյալ ուժեր են բերվել Երեւան եւ ծառայում են: Ամսի 22-ից ոստիկանությունում ընդլայնված խորհրդակցություն տեղի կունենա, ես կտամ համապատասխան հանձնարարականներ»:
Լուսինե ԲՈՒԴԱՂՅԱՆ
