Ավստրիայի մայրաքաղաք Վիեննայում մոտ 17 հազար ձախ ցուցարարներ հանգստյան օրերին դուրս են եկել փողոց՝ բողոքելով կառավարության հակաէմիգրացիոն քաղաքականության դեմ, կանցլեր Սեբաստիան Կուրցը քննադատության է արժանանում նաև սեփական ճամբարի ներսում, գրում է dpa գործակալությունը:
Բողոքի մասնակիցներն ու քննադատները, մասնավորապես, կասկածի տակ են դնում՝ արդյոք Կուրցը շատ հեռուն չի գնում՝ երիտասարդ ապաստան փնտրողների և ընդհանուր առմամբ ներգաղթյալների նկատմամբ իր չափազանց խիստ քաղաքականությամբ:
Բողոքի ալիքը սկսվել է դեռ անցյալ ամիս Վորարլբերգ նահանգում, որտեղ 32-ամյա կանցլերը մասնակցում էր մի միջոցառման: Ներկաներից ոմանք մեղադրել են նրանք հղի մի հայ կնոջ և նրա ընտանիքին արտաքսելու համար:
«Եթե դուք չեք ցանկանում մեզ հետ խոսել այստեղ, մենք կարող ենք ցույցեր կազմակերպել փողոցում»,- բղավել է ներկաներից մեկը:
Կնոջը վտարելու որոշումը քննադատության է արժանացել նաև Կուրցի կուսակից, նահանգապետ Մարկուս Ուոլների կողմից, որն այդ որոշումն անվանել է «սխալ և անմարդկային»:
Պատրաստեց՝ Վիկտորյա ԱՆԴՐԵԱՍՅԱՆԸ
