Իրավապաշտպան Արթուր Սաքունցը կարծում է, որ մարդու իրավունքների պաշտպանության ոլորտում ՀՀ նոր իշխանությունը ոչ բոլոր մարտահրավերներին է կարողանում դիմակայել: «Ոստիկանական բաժանմունքներում բռնությունները չեն դադարել, իսկ հոգեբուժական հաստատություններում իրավիճակը մտահոգիչ է»,-«Հոդված 3» մամուլի ակումբում այսօր լրագրողների հետ հանդիպմանը որպես օրինակներ մատնանշեց նա:
Արթուր Սաքունցը համոզմունք հայտնեց, որ ոստիկանական բաժիններում խոշտանգումների վերացման եւ արգելման ուղղությամբ անհապաղ պետք է միջոցներ ձեռնարկել. «Իրավապաշտպանները մտահոգություններ ունեն»: Արձագանքեց արդարադատության փոխնախարար Վիգեն Քոչարյանը՝ շեշտելով, որ ՀՀ նոր իշխանությունն ունի քաղաքական կամք՝ այդ չարիքի վերացման համար. «Դրա դրսեւորումը կարող է լինել այն, որ Ոստիկանության հետ ներկայումս մշակում ենք օրենսդրական փոփոխությունների փաթեթ: Ըստ դրա՝ ոստիկանական բաժանմունքներում տեղի ունեցող այն գործընթացները, որոնք կապված են բերման ենթարկված անձի հետ, ամբողջությամբ կտեսաձայնագրվեն: Հստակ կլինեն ոստիկանության գործողություններն ու ընթացակարգերը»:
Վիգեն Քոչարյանն իրավապաշտպաններին կոչ արեց ակտիվ լինել, առաջարկներ եւ դիտողություններ ներկայացնել, երբ ամբողջությամբ պատրաստ կլինի օրենսդրական փոփոխությունների փաթեթի նախնական տարբերակը. «Այս ոլորտում մեծ անելիքներ կան»:
Ասուլիսի մասնակից իրավապաշտպանները նաեւ մտահոգություն հայտնեցին, որ հայաստանյան վերջին քաղաքական զարգացումներից հետո հանրության շրջանում ատելության խոսքի աճ կա: Վիգեն Քոչարյանն այս առնչությամբ նշեց. «Համաձայն չեմ կարծիքների հետ, թե իշխանությունը որեւէ կերպ չի արձագանքել հանրության շրջանում հաստատված ատելության խոսքին: Վարչապետը քանիցս անդրադարձել է դրան, թեեւ խնդիրն այնպիսինն է, որ դրսեւորումները համակարգային չեն»:
https://www.facebook.com/aravot.am/videos/366826937218152/
Լուիզա ՍՈՒՔԻԱՍՅԱՆ
