Մոսկվան ակնկալում է, որ Հայաստանի նոր իշխանությունները կարող են խիզախություն գտնել դիմակայել ԱՄՆ-ի շանտաժին ու ճնշմանը և ինքնուրույն որոշումներ կայացնել: «Ռիա Նովոստի» գործակալության հետ զրույցում նման հայտարարություն է արել է Ռուսաստանի փոխարտգործնախարար Գրիգորի Կարասինը:
Հոկտեմբերին Երևան այցելեց ԱՄՆ նախագահի՝ ազգային անվտանգության հարցերով օգնական Ջոն Բոլթոնը: Լրագրողների հետ զրույցում նա հայտարարեց, որ ամերիկյան զենքը ցանկացած պարագայում ավելի լավն է, քան ռուսականը, և խորհուրդ տվեց Երևանին իր միջազգային հարաբերություններում «ազատվել պատմական կլիշեից»:
«Ընթացիկ տարում երկրում տեղի ունեցող կտրուկ փոփոխությունների ֆոնին Վաշինգտոնի միջամտությունը նրա ներքին և արտաքին քաղաքական գործերին գնալով ավելի ցուցադրական է դառնում»,- ասել է Կարասինը:
Նրա խոսքով՝ Բոլթոնը վիրավորական կերպով հայ ժողովրդի պատմական փորձն անվանեց «պատմական կլիշե», ինչպես նաև կարգադրեց Հայաստանին գնել ամերիկյան զենք և հնարավորինս արագ միանալ հակաիրական պատժամիջոցներին: «Եթե այդպիսին է հայ-ամերիկյան հարաբերությունների հանրային կողմը, ապա կարելի է պատկերացնել, ինչպիսի «թևերի ոլորում» է կատարվում կուլիսներում»,- ասել է Կարասինը:
Նա հույս է հայտնել, որ խորհրդարանական ընտրություններում մանդատ ստացած Հայաստանի նոր ղեկավարությունը խիզախություն կգտնի դիմակայել «բացահայտ արտաքին շանտաժին և ճնշմանը և կպնդի ինքնուրույն որոշումներ կայացնելու իր սուվերեն իրավունքը»:
Պատրաստեց՝ Վիկտորյա ԱՆԴՐԵԱՍՅԱՆԸ
