Անդրիաս Ղուկասյանի գործով հերթական դատական նիստն այսօր չի կայացել, քանի որ գործով տուժողները՝ մեկը ոստիկան, մյուսը՝ ՊՊԾ գնդի գրավման ժամանակ ենթադրաբար պատանդառված բուժքույր Մալինա Մարգարյանը, չէին ներկայացել ցուցմունք տալու: Դատարանը նրանց հաջորդ նիստում բերման ենթարկելու որոշում է կայացրել: Թե ինչ կապ ունի ՊՊԾ գնդում ենթադրաբար պատանդառված Մալինա Մարգարյանն Անդրիաս Ղուկասյանի գործի հետ, Aravot.am-ը զրուցեց վերջինիս շահերի պաշտպան Կարեն Մեժլումյանի հետ:
Փաստաբանի համար աբսուրդ է այն փաստը, որ Անդրիաս Ղուկասյանին մեղադրում են ՊՊԾ գնդին միանալու փորձ կատարելու համար. «Մալինա Մարգարյանը պետք է պատմի, թե ինչ է կատարվել ՊՊԾ գնդի ներսում, երբ ինքն այնտեղ է եղել, սա ի՞նչ կապ ունի Անդրիաս Ղուկասյանի հետ: Նրան մեղադրում են, թե փորձել է միանալ խմբին, զինվել եւ պատանդառված պահել Մալինա Մարգարյանին ե մյուս բուժաշխատողներին»:
Ըստ Կարեն Մեժլումյանի, մեղադրող-կողմի որեւէ փաստ հիմնավոր չէ. «Անդրիաս Ղուկասյանը չի էլ ցանկացել գնալ ՊՊԾ գունդ: Հեքիաթ է այս ամենը: Գտնում եմ, որ այս գործով «կնքահայր» են Սերժ Սարգսյանը եւ գլխավոր դատախազ Արթուր Դավթյանը: Ցավալի է, որ Դավթյանն իր դատախազի միջոցով շարունակում է Ղուկասյանի հանդեպ մեղադրանքը պաշտպանել դատարանում: Դա այն դեպքում, երբ Արմեն Մարտիրոսյանի, Դավիթ Սանասարյանի եւ Հովսեփ Խուրշուդյանի (նրանք եւս մասնակցում էին դեպի Սարի թաղ երթին) մասով գործը կարճվել է: Դատախազությունն ապօրինի մեղադրանքը շարունակում է պաշտպանել կեղծված ապացույցների հիման վրա»:
Հիշեցնենք, որ Անդրիաս Ղուկասյանը կալանքից ազատվել է «Իմ քայլը» ժողովրդական շարժումից հետո: Նա իրեն մեղավոր չի ճանաչում եւ պնդում է, որ ՊՊԾ գնդին միանալու փորձի մեղադրանքը շինծու է ու քաղաքական հետապնդում իր հանդեպ: Ղուկասյանը մեղադրվում է 2016թ. հուլիսի 29-ին զանգվածային անկարգություններ կազմակերպելու եւ ոստիկանության ՊՊԾ գունդը գրաված «Սասնա ծռեր» զինված խմբին միանալու փորձի համար:
Լուիզա ՍՈՒՔԻԱՍՅԱՆ
