Անթույլատրելի է քաղաքականացնել Գյումրիի 102-րդ ռազմաբազայի զինծառայողի կողմից կատարված սպանությունը: Այս մասին հայտարարել է Հայաստանում Ռուսաստանի դեսպան Սերգեյ Կոպիրկինը Երևանում տեղի ունեցած մամուլի ասուլիսում:
«Դա, իհարկե, սարսափելի հանցագործություն է, և ես ցանկանում եմ ևս մեկ անգամ խորը և անկեղծ ցավակցություն հայտնել մահացած կնոջ հարազատներին և մերձավորներին: Բնականաբար, այդ հանցագործությունը պետք է քննվի, և հանցագործը պետք է պատիժ կրի: Բայց մեր կարծիքով, անթույլատրելի է քաղաքականացնել այդ գործը: Կարծում եմ, որ քաղաքականացումը չի նպաստի ո՛չ քննության օբյեկտիվությանը, ո՛չ արդյունավետությանը: Եկեք չխանգարենք դրան»,- ասել է դեսպանը:
Նա ընդգծել է, որ այդ միջադեպի շուրջ փորձեր են կատարվել ուղղվածություն տալ քննությանը և որոշակի հասարակական տրամադրություններ ստեղծել:
«Հենց դրա դեմ էլ մենք կտրականապես հանդես ենք եկել և չենք հրաժարվում այդ դիրքորոշումից»,- ասել է դեսպանը՝ նկատի ունենալով մի քանի օր առաջ Ռուսաստանի դեսպանատան տարածած հայտարարությունը սպանության վերաբերյալ:
Դեսպանը նշել է, որ իրեն իրավասու չի համարում մեկնաբանել Գյումրիի միջադեպը, քանի որ դա քննության գործն է, այդ հարցով համագործակցում են ռազմաբազան և քննչական մարմինները:
«Ըստ իմ տեղեկությունների՝ այդ փոխգործակցությունը շատ սերտ իրականացվում է՝ հիմնված հայկական օրենսդրության և այն պայմանագրային-իրավական փաստաթղթերի վրա, որոնցով կանոնակարգվում է Հայաստանում տեղակայված բազան»,- ասել է դեսպանը:
Պատրաստեց՝ Վիկտորյա ԱՆԴՐԵԱՍՅԱՆԸ
