Դեկտեմբերի 19-ին Կոմիտասի թանգարան-ինստիտուտում կկայանա Վահրամ Բաբայանի երաժշտության 3-րդ փառատոնի փակման երեկոն՝ նվիրված կոմպոզիտորի ծննդյան 70-ամյակին:
Վահրամ Բաբայանը սկսել է ստեղծագործել դեռ մանկուց և արդեն ինը տարեկանում գրել է սիմֆոնիա լարային նվագախմբի համար: Կոմպոզիտորը ստեղծագործում է բոլոր ժանրերում, բայց նրա երաժշտության մեջ առավել նկատելի է սիմֆոնիզմը: Հեղինակի ստեղծագործությունները հնչում են ոչ միայն Հայաստանում, այլև աշխարհի 35 երկրներում ՝ Գերմանիայում, Ավստրիայում, Իտալիայում, Ֆրանսիայում և այլուր: Կոմպոզիտորը հանդիսատեսին է ներկայանում նաև որպես դաշնակահար՝ ելույթներ ունենալով 10-ից ավելի երկրներում։ Արժանացել է ՀՀ արվեստի վաստակավոր գործչի կոչմանը, պարգևատրվել ՀՀ մշակույթի նախարարության Ոսկե մեդալով:
Վահրամ Բաբայանի երաժշտության փառատոները կազմակերպվում են սկսած 1998թ.: Այս տարի փառատոնը մեկնարկել է՝ հնչեցնելով ստեղծագործություններ լարային նվագախմբի համար: Ընթացիկ համերգները նախաձեռնել են երիտասարդ կատարողներ՝ հանձին նոր հիմնված երիտասարդական նվագախմբի: Փակման երեկոյի ընթացքում կհնչեն Հրեշտակի արիան Վ. Բաբայանի «Մուսա լեռան 40 օրը» օպերայից, աշնանային երգեր, կոնցերտ անսամբլի համար, կկայանա «Դեպի Լույս» ֆիլմի ցուցադրությունը: Այն Մարիամ Բաղդասարյանի հեղինակած ֆիլմն է Վահրամ Բաբայանի մասին: Երեկոյին իրենց մասնակցությունը կունենան երգչուհի Աննա Փոստոյանը՝ Հարություն Թագվորյանի նվագակցությամբ և անսամբլը՝ ՝Գոռ Իսպիրյանի ղեկավարությամբ:
Աննա ԲԱՂԴԱՍԱՐՅԱՆ
