Դեկտեմբերի 18-ին Երևանի Վ.Բրյուսովի անվան պետական լեզվահասարակագիտական համալսարանում տեղի ունեցավ Արգենտինական կենտրոնի բացումը, որը Հայաստանում Արգենտինայի դեսպանատան և Բրյուսովի համալսարանի երկարատև համագործակցության արդյունքներից մեկն է:
Բացմանը ներկա էին Հայաստանում Արգենտինայի դեսպան Գոնզալո Ուրրիոլաբեիտիան, Համալսարանի ռեկտոր Կարինե Հարությունյանը, Կոնվերս Բանկի խորհրդի անդամ Արթուր Հակոբյանը, համալսարանի դասախոսական կազմը, ինչպես նաև այլ պաշտոնյաներ, հյուրեր և գործընկերներ:
Ի թիվս այլ ձեռքբերումների, որոնք այս երկու հաստատությունները գրանցել են իրենց համագործակցության շրջանակներում, ինչպիսիք են CELU -ի (իսպաներեն լեզվի և օգտագործման սերտիֆիկատը) քննությունների անցկացումը Հայաստանում, իսպանալեզու գրքերի և ձեռնարկների հավաքագրումը, փորձագետների փոխանակումը, դասախոսական և ուսանողական կազմի վերապատրաստումը, սպասվում է նաև իսպաներեն լեզվի դասավանդման առաջին աննախադեպ ձեռնարկի ստեղծումը, ինչին մեծապես կնպաստի կենտրոնի բացումը և հընթացս տարվող աշխատանքները:
Արգենտինական կենտրոնը հնարավորություն կտա իսպաներեն լեզու ուսումնասիրող ուսանողներին և բոլոր նրանց, ովքեր հետաքրքրվում են իսպանական և լատինամերիկյան մշակույթով, լեզուներով և գրականությամբ, այցելել և օգտվել կենտրոնի ծառայություններից: Կենտրոնը նախատեսված է ոչ միայն ուսումնական նպատակների համար, այլ նաև սեմինարների, անհատական աշխատանքների, ինչպես նաև հեռահար ծրագրերի իրականացման համար:
«Այս բավականին սեղմ ժամկետների ընթացքում մենք հասցրել ենք իրականացնել շատ հետաքրքիր և կարևոր նախագծեր, – նշեց Հայաստանում Արգենտինայի դեսպան Գոնզալո Ուրրիոլաբեիտիան: Արդեն երեք անգամ Արգենտինայից Հայաստան են ժամանել բարձրակարգ մասնագետներ, ովքեր ոչ միայն վերապատրաստել են այս համալսարանի դասախոսներին և ուսանողներին, այլ նաև մի շարք հանդիպումներ են ունեցել և իրենց փորձով կիսվել այլ հաստատությունների մասնագետների հետ ևս: Հուսով եմ, որ այս համագործակցությունը էլ ավելի է խթանելու մեր երկրների բարեկամությունը, ամրապնդելու է կապերը, քանի որ օտար լեզվի ուսուցումը ոչ միայն սովորեցնում է տվյալ լեզուն, այլ նաև մշակույթն և լեզվամտածողությունը» :
Հարկ է նշել, որ Արգենտինայի դեսպանության կողմից իրականացվող «Մեկ գիրք հանուն ընկերության» ծրագրի շրջանակներում հավաքվել է ավելի քան 250 գիրք, որոնք նվիրաբերվել են կենտրոնին և կօգտագործվեն ուսումնական նպատակներով:
CELU քննությունը Հայաստանում իրականացվում է 2017թ. մարտից: Այն Արգենտինայի ազգային համալսարանների կոնսորցիումի կողմից առաջարկվող իսպաներենի` որպես օտար լեզվի իմացությունը հավաստող միջազգային վկայագիր է:
Արգենտինական կենտրոնի վերանորոգումն ու կահավորումն իրականացվել է Կոնվերս Բանկի աջակցությամբ:
Հայաստանում Արգենտինայի դեսպանություն
