«Ամբողջ թիմի համար շատ մեծ պատասխանատվություն է…ի՞նչ պետք է անես արդեն 15 տարի կայացած մեծ փառատոնի հետ, որն ունի միջազգային համբավ: Չնայած երկար մտածելուց հետո հասկացանք, որ կարող ենք մեր թիմով էլ նոր բան բերել փառատոն: Նորություններ կլինեն, սակայն դրանք ծայրահեղ ու կտրուկ չեն լինելու»,- ասաց «Ոսկե ծիրան» կինոփառատոնի նորանշանակ տնօրեն Հասմիկ Հովհաննիսյանը: Հավելեց, որ զուգահեռ ուսումնասիրությունների փուլում են` աշխատանքը թիրախային եւ նորարարական կազմակերպելու նպատակով:
Նշեց, որ փորձելու են աշխատել երկարաժամկետ ծրագրով, պատրաստվում են թարմացնել, վերաբրենդավորել փառատոնը, քննարկում են հնարավոր բոլոր տարբերակները, որ «Ոսկե ծիրանը» ինչպես երեւանցիների, այնպես էլ արտասահմանցի այցելուների համար սիրելի փառատոն մնա:
Մանրամասները` տեսանյութում:
Հասմիկ Հովհաննիսյանն ասաց, որ փորձելու են Երեւանում ընդլայնել «Ոսկե ծիրանի» ներկայությունը, ինչի նպատակով հանդիպում են ունեցել Երեւանի քաղաքապետարանի ներկայացուցիչների հետ: «Մի քիչ ավելի կանաչ ու բնապահպանական մոտեցում ենք ունենալու, որովհետեւ սովորաբար փառատոները եւ մասշտաբային միջոցառումները մեծ ծավալի տպագրություն են ունենում, մինչդեռ այդ ամենը կարելի է անել խաղայնացված մոտեցումների միջոցով եւ կրճատել տպագրության քանակը փառատոնում»,-ասաց Հասմիկ Հովհաննիսյանը:
«Ոսկե ծիրան» կինոփառատոնի ծրագրերի նոր տնօրեն Կարեն Ավետիսյանն ընդգծեց, որ կայացած փառատոնում գործի անցնելը պատասխանատվության առումով ունի դրական եւ բացասական կողմեր. «Դրական այն առումով, որ փոխանցվում է մի գործ, որն ունի շատ բարձր նշաձող ու դու պարտավոր ես պահել նշաձողը: Մյուս կողմից էլ՝ հենց դրա մեջ է բարդությունը»:
Հավելեց, որ առայժմ ծրագրերը խմորումների փուլում են, սակայն մի քանի արդեն ուրվագծված կետեր առանձնացրեց. «Մենք ցանկանում ենք, որ 16-րդ «Ոսկե ծիրանում» հիմնական մրցութային ծրագիրը չունենա ժանրային որեւէ սահմանափակում, այսինքն՝ սահմանափակումը պայմանավորված լինի միայն խրոնոմետրաժով: Դա նշանակում է, որ լիամետրաժ ֆիլմերի մրցութային ծրագիրն իր մեջ ներառում է թե խաղարկային, թե վավերագրական, կամ թե կիսախաղարկային, կիսավավերագրական, կիսաանիմացիոն եւ այլ ֆիլմեր»:
Մանրամասները` տեսանյութում:
Ի թիվս այլնի, Կարեն Ավետիսյանը նշեց, որ լիամետրաժ կինոնկարների կողքին կլինի նաեւ կարճամետրաժ ֆիլմերի մրցութային ծրագիր. «Եթե լիամետրաժ ֆիլմերի աշխարհագրությունն անսահմանափակ է, կարճամետրաժ ֆիլմերի դեպքում մրցույթը կվերաբերվի տարածաշրջանին: Այդպիսով հայ կինոն կդիտարկվի տարածաշրջանային համատեքստում, եւ եւս մեկ անգամ առիթ կլինի հասկանալ, թե ինչ է կատարվում մեր եւ հարեւան երկրների կինոինդուստրիայում:
Որտե՞ղ է մեր դերը եւ նշանակությունն այնտեղ: Նույն տարածաշրջանային տրամաբանությունը շարունակելով կունենանք մեկ այլ ծրագիր, որը կլինի ոչ մրցութային լիամետրաժ ֆիլմերի, որը լինելով ոչ մրցութային՝ կունենա ՖԻՊՐԵՍԻ-ի մրցանակ»:
«Ոսկե ծիրանի» երիտասարդ ղեկավար կազմը նաեւ տեղեկացրեց, որ 16-րդ «Ոսկե ծիրանը» կունենա «Խելառ կեսգիշեր» ծրագիրը, որի շրջանակում կեսգիշերից հետո կցուցադրվեն ռադիկալ, էքսպերիմենտալ կինոյի նմուշներ, այդ թվում՝ սարսափ, էրոտիկ ֆիլմեր: «Ոսկե ծիրանի» ֆիլմերի հայտերը կընդունվեն հունվարի 10-ից, իսկ փառատոնը, ինչպես միշտ, կկայանա հուլիսի երկրորդ շաբաթվա ընթացքում` հուլիսի 7-14-ը:
Գոհար ՀԱԿՈԲՅԱՆ
