Թեժ մթնոլորտում Հայաստանի հանդբոլի ֆեդերացիայի նախագահ ընտրվեց Հարություն Մելքոնյանը

Անցկացվեց ՀՀ հանդբոլի ֆեդերացիայի կոնֆերանսը, որի օրակարգում մեկ հարց էր՝ նախագահի արտահերթ ընտրություն: Կոնֆերանսին հրավիրված 40 պատվիրակներից ներկա էին 37-ը: Նրանք մեկ րոպե լռությամբ հարգեցին ընթացիկ տարում կյանքին հրաժեշտ տված ֆեդերացիայի նախագահ Սարգիս Գրիգորյանի եւ մյուս գործընկերների հիշատակը, որից հետո անցան օրակարգային միակ հարցին: Առաջադրվել էր երկու թեկնածու՝ մոսկվաբնակ գործարար, նախկին հանդբոլիստ Արսեն Խաչատրյան եւ Հարություն Մելքոնյան:

Առաջին թեկնածուի ելույթի հենց սկզբից պարզ դարձավ, որ նա նախատեսում է խոսափողը զբաղեցնել առնվազն երկու ժամ: Դա բուռն բանավեճերի առիթ դարձավ, ուստի կոնֆերանսը քվեարկությամբ որոշեց նախագահի թեկնածուներին իրենց ծրագրերը ներկայացնելու համար տրամադրել մինչեւ 20 րոպե:

Արսեն Խաչատրյանը խիստ քննադատության ենթարկեց հանդբոլի ֆեդերացիայի վերջին 20 տարվա աշխատանքը՝ նշելով, որ այդ ամբողջ ընթացքում մարզաձեւը Հայաստանում բոլոր առումներով նահանջ է ապրել եւ ներկայացրեց մարզաձեւը վերածնելու իր պատկերացումները, ընդհուպ մինչեւ պետությունից հատկացվող բյուջեի առնվազն եռապատկում իր ընտրվելու դեպքում: Նա հատկապես դժգոհեց ֆեդերացիայի՝ 20 տարվա հնություն ունեցող գործող կանոնադրությունից, որը ստեղծված իրավիճակի հիմնական պատճառն է:

Հարություն Մելքոնյանը ներկայացրեց ֆեդերացիայի կատարած աշխատանքները, շնորհակալություն հայտնեց մարզային ֆեդերացիաների նախագահներին, մարզադպրոցների տնօրեններին, մարզիչներին, որոնք երկրի ծանր իրավիճակներում հանդբոլի խմբեր են պահել ու այսօր այնտեղ զբաղվում են մարզաձեւով: Նա նաեւ հանձն առավ, որ ընտրվելու դեպքում իր առաջին քայլը կլինի ֆեդերացիայի հանձնարարությամբ կանոնադրությունը փոխելը եւ ՀԿ-ների մասին օրենքի պահանջներին համապատասխանեցնելը: Հարություն Մելքոնյանը, նշելով, որ ծրագիր ներկայացնելը եւ ելույթ ունենալը միանգամայն տարբեր բաներ են, պատվիրակներին եւ հյուրերին ներկայացրեց ֆեդերացիայի հետագա աշխատանքների կազմակերպման հիմնական ուղղությունները, որ պատրաստվում է իրականացնել ընտրվելու դեպքում:

Կրքերը բորբոքվեցին նախագահի ընտրությունը բաց թե փակ քվեարկությամբ կազմակերպելու շուրջ: Կոնֆերանսի նախագահողը տեղեկացրեց, որ ֆեդերացիայի կանոնադրությամբ նախագահն ընտրվում է ձայների պարզ մեծամասնությամբ: Նա վկայակոչեց նաեւ վերադաս հանդբոլի միջազգային ֆեդերացիայի կանոնադրության այն հատվածը, որտեղ գրված է՝ որպես կանոն ֆեդերացիայի նախագահի քվեարկությունն անցկացվում է բաց քվեարկությամբ: Տեղեկացրեց նաեւ, որ կա այնպիսի կետ, ըստ որի կոնգրեսի պատվիրակների պահանջով քվեարկությունը կարող է կազմակերպվել փակ: Իսկ այս դեպքում կողմնորոշվելու միակ տարբերակը այդ հարցը կոնֆերանսում քվեարկության դնելն է: Այստեղ տեսակետները սկզբունքորեն հակադարձ էին, ինչի արդյունքում կողմերը ընդհանուր հայտարարի չեկան: Ստեղծվեց խառնաշփոթ իրավիճակ: Ի վերջո, քվեարկությամբ որոշվեց նախագահի ընտրությունն անցկացնել բաց եւ ձայների մեծամասնությամբ Հայաստանի հանդբոլի ֆեդերացիայի նախագահ ընտրվեց Հարություն Մելքոնյանը:

Մյուս թեկնածուն՝ Արսեն Խաչատրյանը, հայտարարեց, որ բողոքարկելու է կոնֆերանսի ընդունած որոշումը եւ դիմելու է դատախազություն:

Աշոտ ՀԱԿՈԲՅԱՆ