Այսօր արդարադատության նախարարի պաշտոնակատար Արտակ Զեյնալյանի տարեվերջյան ամփոփիչ ասուլիսն էր. նա ներկայացրեց իր պաշտոնավարման ընթացքում իրականացրած փոփոխությունները, պատասխանեց ոլորտին առնչվող հարցերին:
Aravot.am-ը պարոն Զեյնալյանից հետաքրքրվեց իր նախկին՝ խորհրդարանական գործընկեր Էդմոն Մարուքյանի եւ ԲՀԿ-ի փոխադարձ մեղադրանքներից ու փոխհրաձգությունից:
ԲՀԿ-ի անդամները Մարուքյանին մեղադրում են Սերժ Սարգսյանի փեսայի պրոյեկտ լինելու մեջ, Մարուքյանն էլ հերքում է, նշելով՝ Գագիկ Ծառուկյանը Մարտի 1-ի գործին առնչություն ունի եւ այլն: Երեկ Մարուքյանը լայվով պատասխանել է իր հասցեին ուղղված մեղադրանքներին: Այսօր ԲՀԿ-ն էլ կրկին անդրադարձել է Մարուքյանի լայվին:
Aravot.am-ն այսօր Արտակ Զեյնալյանից հետաքրքվեց իր երբեմնի քաղաքական եւ խորհրդարանական եւ «Ելք» դաշինքի կազմում միասին աշխատած «Լուսավոր Հայաստանի» առաջնորդ Էդմոն Մարուքյանից՝ արդյոք կասկածել է կամ նկատել, որ նա կարող էր ինչ-որ մեկի պրոյեկտ լիներ եւ ինչպես կգնահատի այս փոխհրաձգությունը:
«Այնքան տարբերվում է այսօրվա առարկայից ձեր հարցը: Ես ձեռնպահ կմնամ պատասխանել երկու քաղաքական ուժերի եւ նրանց ներկայացուցիչների, ձեր ձեւակերպմամբ՝ հրաձգություններին»,-ասաց Զեյնալյանը:
Արդյոք «Լուսավոր Հայաստանը» կարող է լինել ընդդիմություն, ինչպես ինքն է հայտարարում, մեր այս հարին էլ Զեյնալյանը հստակ պատասխան չտվեց. «Քաղաքական փոքրամասնությունն Ազգային Ժողովում իշխանություն է, քաղաքական փոքրամասնություն է, բայց նրանք ունեն իշխանական լծակներ եւ նախկին ընկալումը՝ իշխանություն-ընդդիմություն պետք է տրանսֆորմացիայի ենթարկվի: Բոլորն իշխանություններ են՝ քաղաքական մեծամասնություն եւ քաղաքական փոքրամասնություն, եւ այս հարաբերություններն այսպես պետք է ձեւավորվեն եւ ելնեն այս իրողությունից: Նրանք երկրի կառավարման համար պատասխանատու են՝ ե՛ւ քաղաքական մեծամասնությունը, ե՛ւ քաղաքական փոքրամասնությունը»:
Մանրամասները՝ տեսանյութում:
Նելլի ԲԱԲԱՅԱՆ
