Այսօր արդարադատության նախարարի պաշտոնակատար Արտակ Զեյնալյանի ասուլիսի ժամանակ լրագրողները հետաքրքրվեցին «Սասնա ծռեր» խմբից սպանության համար մեղադրվող Արմեն Բիլյանի եւ Սմբատ Բարսեղյանի մասին։ Նրանց վրա համաներումը չտարածվեց, իսկ նույն խմբից համաներմամբ ազատ արձակված Հայկ Կյուրեղյանը հայտարարել է, որ նրանք քաղբանտարկյալներ են:
«Ես ենթադրում եմ, որ նրանք կասկածվում են սպանության մեջ: Կարծում եմ՝ ոչ, նրանք քաղաքական բանտարկյալներ չեն: Համաներման մասին օրենքում բացառություն է կատարված սպանության համար դատապարտվածների մասով: Մարդիկ են սպանվել, եւ ՀՀ-ն պարտավոր է որպես կյանքի իրավունքի երաշխավոր նաեւ ապահովել արդյունավետ քննությունը, իսկ դրա բաղադրատարրերից է հանդիսանում նաեւ գործի բացահայտումը եւ մեղավորներին պատժելը՝ արդարացի, համաչափ պատիժը»,-ասաց Զեյնալյանը:
Նա նաեւ նշեց, որ այս խմբի անդամների գործի քննությունը շարունակվում է, իսկ «Սասնա ծռեր» խմբի անդամները իրավունք ունեն դիմելու ՄԻԵԴ։
Նելլի ԲԱԲԱՅԱՆ
