«Հասկանալի չէ ԲՀԿ-ի եւ «Լուսավոր Հայաստանի» միջեւ իրավիճակը հետընտրական շրջանում: Քաղաքական դաշտը նորից վերածվում է գաղափարական պայքարից զուրկ պատկերի»,-«Տեսակետ» մամուլի ակումբում այսօր անդրադառնալով ԱԺ անցած «Լուսավոր Հայաստանի» եւ ԲՀԿ-ի միջեւ ծագած վեճին, ասաց «Ազգային առաջընթաց» կուսակցության վարչության անդամ Լուսինե Հարոյանը:
Հիշեցնենք, որ ԲՀԿ-ական Վահե Էնֆիաջյանը սոցցանցի իր էջում գրել էր. «Էդմոն Մարուքյանը պետք է զրկվի պատգամավորական մանդատից, նա շարքային հանցագործ է, որը 2012 թ. խորհրդարանական ընտրությունների ժամանակ պատգամավոր է ընտրվել՝ կեղծելով պետական մի շարք փաստաթղթեր: Նա 1 տարի 17 օր Հայաստանում չի եղել, սակայն Ոստիկանության անձնագրային ծառայությունը Մարուքյանին տեղեկանք է տվել առ այն, որ նա մշտապես բնակվել է Հայաստանում»: Մարուքյանն էլ արձագանքել է մեղադրանքներին:
Լուսինե Հարոյանի բնորոշմամբ. «Իրար հասցեին սպառնալիքներ են տալիս, խոսում են ինչ-որ հանցագործությունների եւ ապօրինությունների մասին: Դա զարմանալի է: Եթե գիտեին, ապա ինչո՞ւ են սպասում, ինչո՞ւ հաղորդում չէին տալիս հանցագործության մասին եւ հիմա էլ սպառնում են նորերը բացահայտել: ԲՀԿ-ից սպառնալիքներ են հնչում, եւ խոստանում են բացահայտել, թե ով է Էդմոն Մարուքյանի կուսակցության հովանավորը: Հասկանալի է, որ այն ունի լուրջ հովանավոր(ներ), որովհետեւ քարոզարշավի ժամանակ ծախսել է 70 միլիոն դրամից ավելի գումար: Իրենք ասում են, թե նվիրատվություններ են անում լուսավոր քաղաքացիները, բայց դա ծիծաղելի է»:
Ըստ Լուսինե Հարոյանի՝ նոր խորհրդարանում ԲՀԿ-ն եւ «Լուսավոր Հայաստանը» չեն կարող ընդդիմադիր ուժեր լինել:
«Ազգային առաջընթաց»-ը, հիշեցնենք, դեկտեմբերի 9-ի ԱԺ ընտրություններում չհաղթահարեց անցողիկ շեմը:
https://www.facebook.com/aravot.am/videos/264240787581494/
Լուիզա ՍՈՒՔԻԱՍՅԱՆ
