ՀՀ Կոտայքի մարզի ընդհանուր իրավասության առաջին ատյանի դատարանը, Գ. Շահբազյանի նախագահությամբ, բավարարել էր ՀՀ քրեական օրենսգրքի 104-րդ հոդվածի 1-ին մասով նախատեսված արարք կատարելու համար դատապարտված Ստեփանավան քաղաքի 31-ամյա բնակչուհի Դիանա Շատանովայի վերաբերյալ ՀՀ ԱՆ «Աբովյան» ՔԿՀ-ի կողմից ներկայացված պատժից պայմանական վաղաժամկետ ազատելու վերաբերյալ միջնորդությունը: Դատապարտյալը սպանությունը կատարել էր անուղղակի դիտավորությամբ, ինչպես դատարանի իրավական գնահատականներում է արձանագրվել, տուժողի հակաօրինական վարքագծի արդյունքում: Նրան մնացել էր կրելու պատժից 2 տարի 2 ամիս ժամանակահատված:
ՀՀ Կոտայքի մարզի ընդհանուր իրավասության դատարանի դատավոր Գ. Շահբազյանին իր բացատրություններն էր ներկայացրել ՀՀ ԱՆ «Աբովյան» քրեակատարողական հիմնարկում պատիժը կրող դատապարտյալ Դիանա Շատանովայի պաշտպանը՝ հանրային պաշտպան Գայանե Գրիգորյանը:
«Աբովյան» ՔԿՀ-ի պետ, արդարադատության գնդապետ տիկին Գ. Վարդանյանի կողմից միջնորդություն է ներկայացվել, որով նա միջնորդել է մարզի ընդհանուր իրավասության դատարանի նախագահին քննարկել դատապարտյալ Դ. Շատանովայի պատիժը կրելուց պայմանական վաղաժամկետ ազատելու (պատժի չկրած մասն ավելի մեղմ պատժատեսակով փոխարինելու) հարցը:
Համաձայն ՔԿՀ պետի կողմից հաստատված զեկույցի՝ դատապարտյալի նկատմամբ քաղաքացիական հայց, պահանջ չի եղել:
Կին պետը տեղեկացրել էր, որ դատապարտյալը մասնակցել է «Իրավական կրթության եւ վերականգնողական ծրագրերի իրականացման կենտրոն» ՊՈԱԿ-ում իրականացվող «Սոցիալական ուսուցում եւ կյանքի հմտություններ» դասընթացին, ապա՝ «Առողջ ապրելակերպ» դասընթացին:
Դատապարտյալի խնամքին անչափահաս որդին էր, որը սովորում էր ռազմական ուսումնարանում:
Հանրային պաշտպան Գայանե Գրիգորյանը հղում էր կատարել «Մարդու իրավունքների եւ հիմնարար ազատությունների մասին» կոնվենցիայի 6-րդ հոդվածին, համաձայն որի՝ «Քրեական հանցագործություն կատարելու մեջ մեղադրվող յուրաքանչյուր ոք ունի հետեւյալ նվազագույն իրավունքները. բավարար ժամանակ ու հնարավորություններ` իր պաշտպանությունը նախապատրաստելու համար, պաշտպանելու իրեն անձամբ կամ իր ընտրած դատապաշտպանների միջոցով, երբ դա պահանջում են արդարադատության շահերը»:
Պաշտպանը հայտնել էր. «Դատապարտյալի ուղղման վերաբերյալ տրվել է եզրակացություն, համաձայն որի` պատժի կրման ընթացքում վերջինս դրսեւորել է օրինապահ վարքագիծ, պահպանել է համակեցության կանոնները, քրեական մշակույթին չի ներգրավված, կապը ընտանիքի անդամների հետ պահպանում է տեսակցությունների եւ հեռախոսակապի միջոցով, հանցավոր հակումներ չունի»:
Դատարանը բավարարել էր ՔԿՀ պետի միջնորդությունն ու պաշտպանի բացատրությունները, եւ կին դատապարտյալն ազատ է:
Հիշեցնեմ, որ քրեական գործը լսվել է Լոռու մարզի ընդհանուր իրավասության դատարանում:
Ըստ Դիանա Շատանովային առաջադրված մեղադրանքի՝ նա 2013թ. օգոստոսի 7-ին սպանել էր տուժող Կ. Այվազյանին: Դատարանում նա իր մեղքը չէր ընդունել եւ ասել էր. «Դիմացի շենքի բնակիչներից էր, եկել է իր տուն, անպարկեշտ պահանջներ է ներկայացրել»: Դիանան մերժել է:
ՌՈՒԶԱՆ ՄԻՆԱՍՅԱՆ
«Առավոտ» օրաթերթ
14.12.2018
