Հիմա շատ են խոսում ՀՀԿ-ի թալանի, համակարգային կոռուպցիայի մասին: Aravot.am-ը 6-րդ գումարման ԱԺ պատգամավոր Խոսրով Հարությունյանին հարցրեց՝ դուք չե՞ք ափսոսում, որ այդ թիմի մաս եք կազմել: Նա պատասխանեց, որ թալանը, կոռուպցիան բոլոր ՀՀԿ-ականների վրա տարածելը սխալ է.
«Իհարկե, եղել են մարդիկ, որ ՀՀԿ-ն նաեւ օգտագործել են՝ սեփական տնտեսական խնդիրները լուծելու համար: Սա աներկբա փաստ է եւ հերքել չի կարելի: Արդյոք նրանք պետք է պատասխան տան՝ ժամանակը ցույց կտա: Ես այն կարծիքին եմ, որ պետք էր գիծ քաշել եւ ասել՝ ահա խաղի կանոնները, որից հետո ով խախտում է խաղի կանոնները՝ կպատժվի, որովհետեւ երբ որ սկսում եք հետ գնալ՝ պարզ չի մինչեւ ուր եք գնալու: Նույնիսկ հիմա սկսում են խոսել՝ եկեք սկսենք 90-ից: Դա կլինի ամենակործանարարը այս քաղաքական պրոցեսի համար: Նման պայմաններում ոչ մի ներդրող ոտք չի դնի հանրապետություն: Եթե լյուստրացիա սկսվեց՝ ոչ մեկը չի մտնի: Պետք է գիտակցել, թե սա ինչ վտանգավոր է: Տվյալ դեպքում ինչ-որ մեկի կրքերը, զգացմունքները բավարարելը ոչինչ չի նշանակում: Հարկավոր է բանականությամբ առաջնորդվել, իսկ բանականությունը ասում է նրա մասին, որ պետք է ստեղծել նախադրյալներ՝ հետագայում կայուն զարգացման համար, իսկ այդ նախադրյալները հետ գնալով չեք ստեղծում, ավելի շատ պրոբլեմ եք ստեղծում: Դրա համար իմ հորդորը իշխանություններին՝ երբեւէ չտրվել լյուստրացիայի գայթակղությանը: Ի դեպ, ոչ մի երկիր, այդ թվում՝ բալթյան երկրները որեւէ հաջողություն այդտեղ չարձանագրեցին, բացի պրոբլեմներից»:
Ինչ վերաբերում է ՀՀԿ-ի հետ համագործակցելուն՝ Խոսրով Հարությունյանն ասաց. «Զղջո՞ւմ եմ ես արդյոք այդ համագործակցության համար, եթե անկեղծ ասեմ, իհարկե, ցավ ապրում եմ, որ ՀՀԿ-ն միգուցե օբյեկտիվորեն հարվածի տակ է հայտնվել: Բայց իմ եւ ՀՀԿ-ի համագործակցության հիմքում ընկած են եղել բոլորովին այլ ընկալումներ: Ես ավելի շատ համակրում էի ՀՀԿ-ի քաղաքական այն գիծը, որը փորձում էր մեր արտաքին քաղաքականության կողմնորոշվածությունը դարձնել ավելի բազմավեկտոր: Ես միշտ կարծել եմ եւ հիմա էլ համոզված եմ՝ մեր պրոբլեմները արտաքին բլոկում են: Մեր ներքին պրոբլեմներն այնտեղից են գալիս: Եթե մենք այդ արտաքին սպառնալիքները, մարտահրավերները չունենայինք, այսօր արագ, վաղը մի քիչ դանդաղ կզարգանայինք, դա հանրային մեծ դիսկուրս վտանգի ընկալման տեսանկյունից չէր կարող առաջացել: Մեր պրոբլեմները արտաքին աշխարհում են…Այն պրոբլեմները, որ դուք ունեք արտաքին ոլորտում, դրանք, երբեմն, ներսում բերում են հանդուրժողականության»:
Մեր հարցին՝ արտաքին աշխարհն ու արտաքին պրոբլեմները ի՞նչ կապ ունեն նրա հետ, որ Սերժ Սարգսյանը հանդուրժել է, որ իր շրջապատի մարդիկ, իր եղբորորդին երկրում ապօրինություններ անեն, հետո Ֆրանկլին Գոնսալես անունով նրան գտնեն ու բերման ենթարկեն, որ 30 մլն հաշիվ կուտակեն, հետո բերեն հետ տան՝ Խոսրով Հարությունյանը պատասխանեց. «Իհարկե, դուք ճիշտ եք: Բայց դուք ինձ հարցրեցիք ՀՀԿ-ի հետ համագործակցության մասին, գոնե ես այդ համագործակցության մեջ եղել եմ պարկեշտ, կոռեկտ: Իմ համագործակցության հիմքում եղել է արտաքին քաղաքականության մեջ վարվող դիրքորոշումը, որը, ըստ իս, ամենակարեւորն է մեր պարագայում: Իհարկե, դա չի նշանակում, որ ես երբեւէ կարող եմ արդարացնել ներսում ամենաթողությունը: Անկասկած՝ ոչ»:
Հռիփսիմե ՋԵԲԵՋՅԱՆ
