Ներկայումս Հայաստանում ավելացել է օտարերկրացի կամավորների թիվը: Հետաքրքիր է, ի՞նչն է նրանց մոտիվացնում այցելել մի երկիր, որը քարտեզի վրա շատ փոքրիկ տեղ է գրավում, բայց միևնույն ժամանակ ապշեցնում իր հմայքով և հյուրասիրությամբ: Այս ամենը փորձեցինք պարզել Ռոբի Լոննոհից, որն արդեն 4 ամիս է, ինչ Հայաստանում է:
Ռոբին Հայաստանում EVS (Եվրոպական կամավորական ծառայություն) կամավոր է, որն այստեղ եկել է կամավորական ծրագրով և սահմանված մեկ տարի ժամկետով: Նա կամավոր է Բրյուսովի անվան համալսարանում, դասավանդում է ֆրանսերեն, ինչպես նաև ֆրանսերենով միջոցառումներ կազմակերպում:
Ռոբին հայտնեց, որ Հայաստանի մասին տեղեկացել է ֆրանսահայ ընկերների միջոցով, որոնք ապրում են Մարսելում: Հենց նրանք էլ խորհուրդ տվեցին Ռոբիին այցելել Հայաստան ու բացահայտել այն:
Ռոբին իր տպավորությունների մասին խոսելիս նշեց, որ Հայաստանն իսկապես հյուրասեր երկիր է, իսկ հայերը` շատ մարդամոտ:
Խոսելով իր դժվարությունների մասին, հավելեց, որ սկզբնական շրջանում մարդիկ իրեն տարօրինակ և հետախուզող հայացքով էին նայում, հետո հաղթահարել է օտարերկրացու «բարդույթը»:
Հայերենը Ռոբիի համար բարդ լեզու է, սակայն մի քանի ամսվա ընթացքում որոշ չափով յուրացրել է եւ կարողանում է հաղորդակցվել:
Կամավորը նշեց, որ արդեն հասցրել է ճամփորդել Հայաստանում՝ Դիլիջան, Ծաղկաձոր, Աևան, Ալավերդի: Առավել շատ նրան դուր է եկել Ալավերդու բնությունը:
«Միակ բանը, որ ինձ զարմացնում է Հայաստանում, դա ուսանողների ոչ ճշտապահ լինելն է: Նրանք միշտ ուշանում են: Մի բան էլ եմ նկատել` Հայաստանում կարծես հիմնականում շեշտը դրված է կանանց կրթության վրա, իսկ տղամարդիկ առհասարակ չեն սովորում»,- նման տպավորություն է ստացել Ռոբին:
Աննա ՀԱԿՈԲՅԱՆ
