«Ընտրությունները հապճեպ իրականացվեցին՝ սեղմ ժամկետներում, ինչը ճնշումներ առաջացրեց ընտրական հանձնաժողովների եւ քաղաքացիական հասարակության ներկայացուցիչների համար»,-դեկտեմբերի 9-ին կայացած ԱԺ արտահերթ ընտրություններում դիտորդական առաքելություն իրականացրած հ/կ-ների մշտադիտարկման արդյունքների հրապարակման ժամանակ այսօր հայտարարեց ՀՀ-ում Եվրամիության պատվիրակության միջազգային օգնության/համագործակցության պատասխանատու Լինե Ուրբանը:
Նրա գնահատմամբ. «Ամեն ինչ չէ, որ 100%-ով է արվել, բայց, ամեն դեպքում, ընտրությունները կազմակերպվեցին»:
Տիկին Ուրբանը նշեց, որ ԵՄ-ն ֆինանսավորել է հայաստանյան քաղաքացիական հասարակության ներկայացուցիչ-կազմակերպություններին, որպեսզի նրանք ապահովեն հաշմանդամություն ունեցող անձանց մասնակցությունն ընտրություններում. «Հաջողությունների հասել ենք, բայց դեռ աշխատանք կա կատարելու, որպեսզի այդ անձինք կարողանան իրենց իրավունքներն իրացնել»:
Լինե Ուրբանը շրջել է ընտրատեղամասերով եւ արձանագրել, որ տարեցները դժվարացել են ինքնուրույն տեղաշարժվել. «Շատերը չէին հասկանում՝ ի՞նչ անել քվեաթերթիկի հետ: Պետք է նվազագույնի հասցնել այն խնդիրները, որոնք խոչընդոտում են այդ մարդկանց ընտրական իրավունքին»:
Լուիզա ՍՈՒՔԻԱՍՅԱՆ
