Սեդրակ Օսիպյանի մասնակցությամբ 2014 թվականին տեղի ունեցած դանակահարության գործը կրկին վերաբացվել է։ Դանակահարության գործով վկա Սամվել Հովհաննիսյանին այս տարվա հոկտեմբերի 22-ին հրավիրել են Քննչական կոմիտե հարցաքննության: Հովհաննիսյանը Aravot.am-ին ասաց, որ Կոմիտեի հատուկ կարևորության գործերով քննիչները իրեն հայտնել են, որ գործի հետ կապված նոր հանգամանքներ են ի հայտ եկել։
Սամվել Հովհաննիսյանը քննիչներից հետաքրքրվել է՝ խոսքը ինչ նոր հանգամանքների մասին է, ինչին ի պատասխան հայտնել են, որ գործով տուժողը, նրա ծնողները հրաժարվել են 2014-ին տված իրենց ցուցմունքներից, բացի այդ Սեդրակ Օսիպյանը, վարույթ իրականացնող մարմնին հայտնել է, որ գործում նոր վկաներ են ի հայտ եկել, ինչպես նաեւ ասել է, որ այս գործով վկա Սամվել Հովհաննիսյանի եղբայրը՝ Սարգիս Հովհաննիսյանն զանգել է իր ծանոթներին ու հայտնել, որ այս գործով տուժողին ինքն է դանակահարել:
Սամվել Հովհաննիսյանը Aravot.am-ին փոխանցեց 2014-ին տուժողի՝ Վանուշ Ալեքսանյանի եղբոր՝ Վիգեն Ալեքսանյանի ցուցմունքների պատճենները:
Հիշեցնենք նաեւ, որ ըստ Սամվել Հովհաննիսյանի, դեպքի օրը գործով տուժող Վանուշ Ալեքսանյանի եղբայրն անցնելիս է եղել Սեդրակ Օսիպյանի և Սամվել Հովհաննիսյանի եղբոր՝ Սարգիս Հովհաննիսյանի կողքով։ Վանուշ Ալեքսանյանի եղբայրը՝ Վիգեն Ալեքսանյանը, թքել է գետնին, Սեդրակ Օսիպյանը հարցրել է՝ « էդ ուրդե՞ ես թքում», Ալեքսանյանը պատասխանել է՝ գետնին, Սեդրակ Օսիպյանն էլ հավելել է՝ «վրաս թքեիր» ու հարվածել է Ալեքսանյանի եղբորը, ինչից հետո տեղի է ունեցել ծեծկռտուք, ավարտվել եղբորն օգնության հասած Վանուշ Ալեքսանյանի դանակահարությամբ։
Արփինե ՍԻՄՈՆՅԱՆ
