Այս պահին Երեւանի ընդհանուր իրավասության դատարանում քննվում է Հայաստանի անվտանգության խորհրդի նախկին քարտուղար Արմեն Գեւորգյանին երկու ամսով կալանավորելու ՀՔԾ-ի միջնորդությունը։
Արմեն Գեւորգյանին 3 նոր մեղադրանք է ներկայացվել՝ առանձնապես խոշոր չափերի կաշառք ստանալու, փողերի լվացման եւ սահմանադրական կարգի տապալմանն օժանդակելու հոդվածներով:
Երեկ դատարանը հետաձգել էր կալանավորման հարցի քննությունը, որ պաշտպանական կողմը կալանավորման հիմքերին ծանոթանա:
Արմեն Գեւորգյանը դատարան մտնելիս լրագրողների հարցերին չցանկացավ պատասխանել. «Ոչինչ չեմ ասելու, մինչեւ դատական նիստը չավարտվի»:
Նա ասաց, որ մեղադրանքին ծանոթ է, չի ընդունում մեղադրանքները, մնացած բոլոր պարզաբանումները կներկայացնեն փաստաբանները:
Հարցին՝ պատահական համարո՞ւմ եք, որ հեղափոխությունից հետո ձեզ մեղադրանք առաջադրեցին՝ Արմեն Գեւորգյանը պատասխանեց. «Եկեք ենթադրություններ չանենք, հանգիստ մեր կյանքով ապրենք, լա՞վ»:
Եթե դատարանն այսօր բավարարի ՀՔԾ միջնորդությունը, Արմեն Գեւորգյանը դատարանում կկալանավորվի:
Հիշեցնենք, որ մինչեւ նոր մեղադրանքներ առաջադրելը Արմեն Գեւորգյանին մեղադրանք էր առաջադրվել արդարադատությանը խոչընդոտելու համար եւ գործը միացվել էր «Մարտի 1»-ի գործին։ Ըստ ՀՔԾ-ի, 2008-ի նախագահական ընտրությունների արդյունքները վիճարկելու ժամանակ Գեւորգյանը ճնշում է գործադրել Սահմանադրական դատարանի դատավորի վրա, որպեսզի նա որոշում կայացնի նախագահի թեկնածու Սերժ Սարգսյանի օգտին։
Հռիփսիմե ՋԵԲԵՋՅԱՆ
