Ո՞վ կրակեց Մարտի 1-ին. «Մակրոնն այդ պատասխանը տվել է»

Հանրապետության հրապարակում մեկնարկած, ապա գլխավոր դատախազության շենքի մոտ շարունակված «Ազատություն նախագահին» նախաձեռնող խմբի հանրահավաքն ավարտվեց: Հանրահավաքի մասնակիցները, որոնք պահանջում են ազատ արձակել ՀՀ 2-րդ նախագահ Ռոբերտ Քոչարյանին, դատախազության շենքի մոտ 10-15 րոպե բողոքի ցույց անելուց հետո կրկին վերադարձան Հանրապետության հրապարակ, որտեղ էլ ավարտվեց ցույցը: Բողոքի այս ցույցն առաջնորդող «Հայոց ազգային դաշինք» քաղաքացիական նախաձեռնության ղեկավար Արմեն Մինասյանը հայտարարեց՝ բողոքի ցույցերը շարունակական են լինելու, եւ մարզերում էլ են համակարգելու նման հանրահավաքներ:

«Մեր պահանջը նույնն է՝ վերջնական արդարադատության հաղթանակն է, այն արդարադատության, որի պայմաններում չեն նշանակի մեղավորներ, եւ քանի որ ես հույս չունեմ, որ պատվերը, որ եկել է հարեւան երկրներից՝ Արցախի հերոսների ցուցակը՝ բանտարկելու, դադարելու է, ուրեմն, հաջորդ անգամ դուրս գալը նշանակում է, որ մենք կրկնապատիկ ուժեղ ենք»,-հայտարարեց Մինասյանը:

Լրագրողների հարցին՝ ինչո՞ւ է կարծում, որ Քոչարյանն անմեղ է, քանի դեռ չկա դատարանի որոշում, Արմեն Մինասյանը պատասխանեց.« Ես ոչ թե կարծում եմ, ես հավատացած եմ, որովհետեւ ես էդ մարդու՝ Ռոբերտ Քոչարյանի ամբողջ ապրած կյանքը, սկզբից մինչեւ վերջ, Հայաստանի հանրապետության քաղաքացու հանդեպ, մեր երկրի շինարարության, մարդու պաշտպանության էդ բոլոր գրասենյակներին, որ անդամակցում ա, Ռոբերտ Քոչարյանի շնորհքն ու գործողություններն են: Քանի դեռ դատարանի կողմից չի ճանաչվել մեղավոր, նա անմեղ է: Հենց այդ փաստով ես ուղղորդվելով միջազգային օրենքներով, Ռոբերտ Քոչարյանին համարում եմ անմեղ»:

Ով կրակեց մարտի 1-ին հավաքված քաղաքացիների վրա, ով սպանեց, այս հարցին էլ Արմեն Մինասյանն այսպես պատասխանեց.«Մակրոնն այս հարցին պատասխանել է՝ երբ դուք գտնվում եք այն վայրում, որտեղ գաթաներ չեն բաժանում, ուրեմն պետք է իմանաք՝ այդ վայրում կարող են լինել վտանգներ: Եվ քանի որ սադրանքն ու բենզինի շիշ կրողներ կային, գնացեք նրանց հարցրեք»:

Մինասյանին հիշեցրին՝ կրակել են չերյոմուխայից, իսկ վերջինս էլ հիշեցրեց՝ Դանիել Վարուժանի մահը.«Նրան կախել էին ծառից ու քերթում էին դանակով, ինչ կապ ունի, թե ինչով դու մահացար եւ ինչպես դու մահացար»:

Ցույցի մասնակիցներից ոմանք հարցին՝ ինչո՞ւ են մասնակցում ի պաշտպանություն Քոչարյանի հանրահավաքին, ասում էին՝ «Նախագահը անձեռնմխելի է, քննությունը կարող է ընթանա առանց Քոչարյանի կալանավորման»: Ոմանք էլ ասում էին, թե մարտի 1-ի գործով այլ մեղավորներ կան՝ նրանք, ովքեր հրահրել են:

Մարտի 1-ի 10 զոհերի համար ո՞վ է մեղավոր, ո՞վ է սպանել նրանց, այս հարցերին Քոչարյանի աջակից ցուցարարները պատասխան չունեին, նրանք արդարացնում էին Քոչարյանին նշելով՝ ճիշտ է վարվել Քոչարյանը, որ արտակարգ դրություն է մտցրել երկրում, արդեն թալան էր գնում, մեքենաներ էին վառում, խանութներ թալանում եւ այլն:

Հանրապետության հրապարակում մի տիկին էլ, որը ներկայացավ Յուլյա Վարդանյան, զարմացած նայելով հանրահավաքի մասնակիցներին ու ապա մատնացույց անելով Արմեն Մինասյանին ասաց.«Համար 6 պալատը լացում է նրա համար: Հոգեբուժական հիվանդանոցը լացում ա ուղղակի իրա համար: Ինչու եք այսքան ուշադրություն գրավում իրա անձի շուրջ այսքան լրատվամիջոցներով: Մարդը հիվանդ է»:

Լրագրողի հարցին՝ ճանաչո՞ւմ եք այդ անձին, որ ասում եք՝ հոգեկան հիվանդ է, տիկինը պատասխանեց՝ «միանշանակ, հիվանդ է, ճանաչում եմ միայն ֆեյսբուքով»:

Անցորդներին, քաղաքացիներին ակնհայտորեն դուր չէր գալիս այս բողոքի ցույցը. նրանք վրդովված դիմելով ցույցի մասնակիցներին ասում էին՝ իսկ ո՞ւր էիք դուք, երբ «պրիվետ Ռոբ» ասելու համար Քոչարյանը մարդ էր սպանում:

Ի դեպ, ֆեյսբուքյան օգտատեր Դավիթ Հովհաննիսյանը հրապարակել է Արմեն Մինասյանի լուսանկարը՝ տեղեկացնելով, որ  հեղափոխությունից հետո նա օրեր շարունակ այցելել է ՔՊ գրասենյակ՝ ունենալով ակնկալիքներ:

Նելլի ԲԱԲԱՅԱՆ