Ընտրություններից առաջ՝ դեկտեմբերի 6-ին ոստիկանության Հրազդանի բաժնում ստացված օպերատիվ տեղեկությունների շրջանակում, ոստիկանության կազմակերպված հանցավորության դեմ պայքարի գլխավոր վարչության, Կոտայքի մարզային վարչության եւ Հրազդանի բաժնի ծառայողների իրականացրած օպերատիվ-հետախուզական միջոցառումների շնորհիվ, ոստիկանության Հրազդանի բաժին էր հրավիրվել նույն քաղաքի մի բնակիչ եւ հաղորդում տվել, որ դեկտեմբերի 2-ին ՀՀ ԱԺ արտահերթ ընտրություններին ռեյտինգային ընտրակարգով մասնակցող թեկնածուներից մեկի շտաբում, նույն շտաբի պետ Ա․Հ․-ն խոստացել է տալ գումարով ծրար՝ եթե քաղաքացին եւ իր կինը ընտրություններին քվեարկեն իր նշած թեկնածուի օգտին։
Այդ փաստի առթիվ հարուցվել էր քրեական գործ եւ Ա. Հ.-ն ձերբակալվել էր:
Այսօր Aravot.am-ը ՀՔԾ-ից տեղեկացավ, որ նախընտրական այդ շտաբի պետին մեղադրանք է առաջադրվել Քրեական օրենսգրքի 154.2 հոդվածի 4-րդ մասի երկրորդ կետի հատկանիշներով՝ պատգամավորի թեկնածուի օգտին կողմ քվեարկելու համար երկու ընտրողի կաշառք առաջարկելու եւ խոստանալու համար:
Նա չի կալանավորվել, կիրառվել է ստորագրություն՝ չհեռանալու մասին:
Մեր տեղեկություններով՝ խոսքը ԲՀԿ-ի ռեյտինգային թեկնածուներից մեկի նախընտրական շտաբի պետի մասին է:
Ըստ «Ազատություն» ռադիոկայանի՝ «ձերբակալվածն Ուկրաինայում ՀՀ նախկին դեսպան Անդրանիկ Մանուկյանի որդի, ԲՀԿ-ի ռեյտինգային թեկնածու Դավիթ Մանուկյանի շտաբի պետն է՝ Արամ Հակոբյանը: Նա ձերբակալված էր, հետո սակայն խափանման միջոց է ընտրվել ստորագրությամբ չհեռանալը: Կուսակցության նախագահ Գագիկ Ծառուկյանի մամուլի խոսնակ Իվետա Տոնոյանը հաստատեց այս տեղեկությունը: ԲՀԿ֊ական Դավիթ Մանուկյանը Գագիկ Ծառուկյանի փեսան է»:
Հռիփսիմե ՋԵԲԵՋՅԱՆ
