Ամիսներ առաջ, երբ Վեոլիա ջուրը սկսեց բաժանորդների մոտ ջրաչափերը փոխել՝ սեփական միջոցներով և անվճար, նրանցից ոմանք չհապաղեցին աշխարհն իրար խառնել, բողոքելով Օպերատորի «ապօրինություններից»:
Պատճառը փոխարինված հնամաշ, իրենց պիտանելիության ժամկետը սպառած ջրաչափերի լաբորատոր ստուգաչափումն էր, ավելի ճիշտ՝ դրա արդյունքները:
Մինչդեռ տվյալ գործառույթը և ստուգման կարգը նախատեսված է օրենսդրությամբ: Ավելին, այն իրականացվում է ՀՀ ՏԶՆՆ Չափագիտության ազգային ինստիտուտի հետ միասին: Հետեւաբար, այստեղ բացառվում է որեւէ սուբյեկտիվություն:
Ի դեպ, արդյունքներն էլ սպասվածի շրջանակներում են: Բաժանորդների ճնշող մեծամասնությունը, ինչ խոսք, օրինապահ քաղաքացիներ են, եւ զարմանալի չէ, որ ջրաչափերի ավելի քան 90 տոկոսի վերաբերյալ ոչ մի դիտողություն Օպերատորը չի ունենում: Ընդ որում, ոչ թե այն պատճառով, որ դրանք ճիշտ են աշխատում: Ոչ, հին չափիչ սարքերը, թեկուզեւ մաշվածությամբ պայմանավորված, չեն գրանցում սպառվող ջրի ողջ ծավալը, ինչի համար էլ, ըստ էության, Վեոլիա Ջուրը ձեռնարկել էր այդ լայնածավալ ու շատ ծախսատար գործընթացը: Պարզապես ակնհայտ է, որ բաժանորդն այս պարագայում մեղավոր չէ դրանց անճշտության համար:
Ուրիշ է ջրաչափերի աշխատանքին ԱՐՏԱՔԻՆ, միտումնավոր միջամտությունը: Ցավոք, դա էլ է մեր իրականության բաղկացուցիչ մասը: Նման դեպքերում Վեոլիա Ջուրը համաձայն օրենսդրության, կատարում է բաժանորդների սպառած ջրի ծախսի վերահաշվարկ, որն ինչ խոսք փոքր թիվ չէ: Վեոլիա Ջուրը նման վերահաշվարկներ մշտապես կատարել է ու շարունակելու է կատարել, ելնելով օրենսդրության պահանջից:
Եվ վճարելու են բաժանորդները իրենց մեղմ ասած սխալնելի համար: Իսկ թե ինչպիսի «սխալների» մասին է խոսքը, ցույց են տալիս ներկայացվող ջրաչափերի վրա կատարված բազմապիսի «մանիպուլյացիաները». անգամ ասեղ ու մեխ կարող է տեսնել ուշադիր ընթերցողը ջրաչափերի մեջ:
Պատկերված ջրաչափերը ներկայումս փոխարինվել են նորերով, սպառման հաշվարկը արդեն հստակ է, թվում է՝ ոչ մի խնդիր չպետք է լինի: Բայց … Երեկ ապօրինություններ թույլ տված որոշ բաժանորդներ այսօր արդեն բողոքում են ջրի «մեծ ծախսից»: Մեկնաբանությունները, ինչպես ասում են, ավելորդ են:
Վեոլիա ջուր ՓԲԸ
Հանրային կապերի ծառայություն
