«Տիկին Զոհրաբյանը նշում է, որ ինքը սիրում է խոսել փաստերով, ուստի, սպասելով դրանց, եւս մեկ անգամ կրկնում ենք, որ Սյունիքի մարզպետի կողմից համայնքապետերին նման հրահանգ, ընտրողների ուղղորդում չի եղել եւ չկա»,-Aravot.am-ի հետ զրույցում, ի պատասխան «Բարգավաճ Հայաստան» կուսակցության ռեյտինգային ցուցակով առաջադրված պատգամավորի թեկնածու Նաիրա Զոհրաբյանի հայտարարությանն՝ ասաց Սյունիքի մարզպետի խորհրդական Արմինե Ավագյանը:
Նաիրա Զոհրաբյանը, որը որպես պատգամավորի թեկնածու առաջադրված էր թիվ 12 ընտրատարածքում՝ Սյունիքի եւ Վայոց Ձորի մարզերում, Aravot.am-ի հետ հարցազրույցում, երեկ էլ իր Ֆեյսբուքյան էջի ուղիղ եթերում նշել էր, որ նախընտրական շրջանում եւ ընտրությունների օրը վարչական ռեսուրս կիրառվել է: Նրա խոսքով. «Ես վստահ եմ կամ ուզում եմ վստահ լինել, որ վարչական ռեսուրսի կիրառումը չի եղել կառավարության կամ վարչապետի կողմից հրահանգավորված, որովհետեւ վարչապետը Սիսիանում հստակ ասաց, որ որեւէ մեկը կփորձի վարչական ռեսուրսով ուղղորդել քվեները դեպի «Իմ քայլը», ապա, այդ քվեներն իրեն պետք չեն»:
Այդուհանդերձ, ըստ Նաիրա Զոհրաբյանի, Սյունիքի մարզպետ Հունան Պողոսյանը, որը «հավատարմորեն եւ անվերապահորեն ծառայել է Ռոբերտ Քոչարյանին այնուհետեւ Սերժ Սարգսյանին, համայնքապետերով, քաղաքապետերով ուղղորդել է «Իմ քայլի» տարբեր թեկնածուներին»:
Մարզպետի խորհրդականն ասաց, որ՝ «Սյունիքի մարզպետ Հունան Պողոսյանն իր տարակուսանքն է հայտնում նման մեղադրանքների հանդեպ, մանավանդ որ, ընդամենը երկու օր առաջ պատասխանել ենք ճիշտ նույն բովանդակությամբ հայտարարություններին:
Ինչ վերաբերում է ինչ-ինչ անհատների ծառայելու մասին տիկին Զոհրաբյանի հայտարարությանը, ապա Հունան Պողոսյանը տեղեկացնում է, որ ի տարբերություն ոմանց, ինքը ծառայել եւ շարունակում է ծառայել միայն իր հայրենիքին ու ժողովրդին»:
Լուսինե ԲՈՒԴԱՂՅԱՆ
