ԵՄ-ի կողմից ֆինանսավորվող` «Ընտրությունները դիտարկող եվրոպական ցանց»(ENEMO) դիտորդական առաքելության ներկայացուցիչները եւս դիտարկել են երեկ ՀՀ ԱԺ ընտրությունների քվեարկության եւ ձայների հաշվարկի գործընթացը՝ 200-ից ավելի ընտրատեղամասերում: «Ընտրություններն անցել են խաղաղ եւ ապահով պայմաններում եւ համապատասխանել են տեղական ու միջազգային չափանիշներին: Իսկ քարոզարշավն անցել է հավասար պայմաններում, ընտրողներն էլ կարողացել են դրսեւորել կամարտահայտություն»,-լրագրողների հետ հանդիպմանն այսօր ասաց առաքելության ղեկավար Զլատկո Վույովիչը:
Նրա գնահատմամբ՝ խախտումները հիմնականում եղել են ընտրողների տեղեկատվության պակասի պատճառով. «Մեծ խախտումներ չեն եղել, ինչը խոստումնալից է: Լարվածություն չի նկատվել: Ընդհանուր առմամբ, ընտրություններն անցել են շատ հաջող: Հույս ունենք, որ նոր ԱԺ-ն կզբաղվի Ընտրական օրենսգրքի բարեփոխումներով: Եթե դրանք չլինեն, հաջորդ ընտրությունները կարող են վտանգված լինել»:
Հիշեցնենք, որ այս գիշեր լրագրողների հետ ճեպազրույցում «Իմ քայլը» դաշինքի առաջնորդ Նիկոլ Փաշինյանը վերահաստատել էր, որ հետամուտ են լինելու ԸՕ բարեփոխմանը:
Զլատկո Վույովիչի խոսքով՝ ՀՀ ԿԸՀ-ն եւ տարածքային ընտրական հանձնաժողովները լավ են աշխատել. «Բայց դեռ շատ պետք է աշխատել, որպեսզի ընտրական գործընթացը դառնա ինքնուրույն եւ կախված չլինի որեւէ քաղաքական ուժի կամքից: Կցանկանայի, որ ԿԸՀ-ն իր հետագա գործունեությունն իրականացնի այնպես, ինչպես իրականացրեց այս անգամ»:
Առաքելության դիտորդները նշեցին, որ որոշ երեւույթներ, օրինակ՝ քվեների հաշվարկի գործընթացը, փոփոխության կարիք ունի: Տեղամասերում դիտարկումների արդյունքում նրանք մի քանի դեպքում նկատել են ընտրության գաղտնիության պահպանման հետ կապված խնդիրներ:
Դիտորդները դրական են գնահատում նաեւ այն փաստը, որ տեղամասերից ուղիղ հեռարձակում է ապահովվում, բայց ոչ բոլոր տեղամասերին էր հնարավոր տեսախցիկներով հետեւել:
Լուիզա ՍՈՒՔԻԱՍՅԱՆ
